پاکستان اور انڈونیشیا کے درمیان دفاعی تعاون میں وسعت

سچ خبریں:انڈونیشیا کے وزیر دفاع کے دورۂ پاکستان میں وزیر اعظم شہباز شریف سے ملاقات ہوئی، دونوں ممالک نے دفاعی پیداوار، مشترکہ سرمایہ کاری اور انسداد دہشت گردی میں تعاون بڑھانے پر اتفاق کیا۔

انڈونیشیا کے وزیر دفاع جنرل سیافری شمس الدین نے ایک رسمی دورے کے دوران وزیر اعظم پاکستان شہباز شریف سے ملاقات کی، جس میں دونوں ممالک نے دوطرفہ دفاعی، اقتصادی اور اسٹریٹجک تعاون کو وسعت دینے کے عزم کا اعادہ کیا۔

یہ بھی پڑھیں:جنیوا میں اسلامی تعاون تنظیم کے سفیروں کی ملاقات اور اسرائیل کی مذمت

وزیر اعظم نے اس موقع پر قاہرہ میں حالیہ ڈی-ایٹ سربراہی اجلاس کے دوران انڈونیشیا کے صدر سے ہونے والی ملاقات کو یاد کرتے ہوئے کہا کہ اسلام آباد اور جکارتہ عالمی و علاقائی فورمز پر ایک دوسرے کی حمایت جاری رکھیں گے۔

ملاقات کے دوران دونوں رہنماؤں نے اقتصادی، تجارتی، دفاعی، اور اسٹریٹجک شعبوں میں تعلقات کو گہرا کرنے پر زور دیا،شہباز شریف نے کہا کہ پاکستان مشترکہ مفاد پر مبنی منصوبوں میں سرمایہ کاری، دفاعی پیداوار اور ٹیکنالوجی کی منتقلی جیسے شعبوں میں انڈونیشیا کے ساتھ تعاون کو مزید مضبوط بنانا چاہتا ہے۔

وزیر اعظم نے دونوں ممالک کے درمیان دفاعی تعاون کے معاہدے کے تحت جاری منصوبوں کا بھی جائزہ لیا اور ان منصوبوں کی تیز رفتار تکمیل پر زور دیا۔ اس موقع پر دونوں ممالک کے وزرائے دفاع، دفاعی پیداوار، اور دیگر اعلیٰ حکام بھی موجود تھے۔

وزیر دفاع انڈونیشیا نے پاکستان کے ساتھ دفاعی شعبے میں تعلقات کو مزید مستحکم کرنے کی خواہش ظاہر کی اور کہا کہ ان کا ملک دفاعی پیداوار کے میدان میں شراکت داری بڑھانے کے لیے پرعزم ہے۔

مزید پڑھیں:پی آئی اے نے انڈونیشیا میں پھنسے طیاروں کا تنازع حل کرلیا

واضح رہے کہ گزشتہ سال موسم گرما میں پاکستان اور انڈونیشیا کے درمیان انسداد دہشت گردی پر مبنی دوسرا مشترکہ فوجی مشق پاکستان کی میزبانی میں منعقد ہوا تھا، جس کا مقصد تجربات کا تبادلہ اور عسکری تعاون بڑھانا تھا،مزید برآں، سال 2014 میں پاکستانی آرمی چیف کے دورۂ انڈونیشیا کے دوران بھی دفاعی تعاون اور فوجی تربیت میں اضافے پر اتفاق کیا گیا تھا۔