یورپی ممالک آبنائے ہرمز سے گزرنے کے لیے ٹیکس کی ادائیگی پر آمادہ: بلومبرگ

?️ 3 جولائی 2026

سچ خبریں:بلومبرگ کی رپورٹ کے مطابق متعدد یورپی ممالک نے آبنائے ہرمز سے گزرنے والی اپنی کشتیوں کے لیے ایران اور عمان کو ٹیکس ادا کرنے کے تصور کو قبول کر لیا ہے، جبکہ اس حوالے سے اخراجات کی حتمی مقدار ابھی طے نہیں ہوئی۔

خبر رساں ادارے بلومبرگ نے رپورٹ دی ہے کہ متعدد اہم یورپی ممالک نے اس تجویز کو قبول کر لیا ہے کہ ان کی کشتیوں کو آبنائے ہرمز سے گزرنے کے دوران ایران اور عمان کو ٹیکس ادا کرنا ہوگی۔ ان ممالک کا کہنا ہے کہ امریکہ اور صہیونی حکومت کی جانب سے ایران کے خلاف جنگی کارروائیوں کے بعد اس قسم کے اخراجات سے بچنا ممکن نہیں رہا۔

رپورٹ کے مطابق خلیج فارس کے ساحلی عرب ممالک کے بعض عہدیدار بھی، اگرچہ سرکاری مؤقف میں مختلف رائے پیش کرتے ہیں، لیکن غیر سرکاری سطح پر اس تجویز کی حمایت کر رہے ہیں۔

بلومبرگ کے مطابق، آبنائے ہرمز سے گزرنے والی کشتیوں سے وصول کی جانے والے ٹیکس کی مقدار ابھی تک واضح نہیں ہے، تاہم یورپی ممالک نے ایرانی اور عمانی حکام سے درخواست کی ہے کہ کشتیوں کے ساتھ ان کی قومی شناخت کی بنیاد پر کوئی امتیازی سلوک نہ کیا جائے۔

رپورٹ میں مزید کہا گیا ہے کہ گزشتہ ہفتے عمان نے یورپی حکام کو آگاہ کیا تھا کہ آبنائے ہرمز میں جنگ سے پہلے والی صورتحال کی بحالی ممکن نہیں رہی۔ اس کے علاوہ اس آبی گزرگاہ سے گزرنے والی کشتیوں کو آلودگی کے خاتمے سے متعلق خدمات اور جہاز رانی کی سہولیات کے اخراجات بھی برداشت کرنا پڑ سکتے ہیں۔