افغانستان میں طالبان حملوں سمیت متعدد خوفناک حادثے، درجنوں افراد ہلاک اور زخمی ہوگئے

2 مئی 2021

کابل (سچ خبریں) افغانستان میں طالبان حملوں سمیت متعدد خوفناک حادثے پیش آئے ہیں جن کے نتیجے میں درجنوں افراد ہلاک اور زخمی ہوگئے ہیں جبکہ 30 سے زائد فوجی اہلکار لاپتا ہوگئے ہیں۔

تفصیلات کے مطابق افغانستان کے دارالحکومت کابل میں 50 آئل ٹینکرجل کر تباہ ہوگئے جس کے نتیجے میں 12 افراد ہلاک اور 8 شدید زخمی ہوئے ہیں۔

افغان میڈیا کے مطابق کابل کے علاقے قلعہ مراد کی مرکزی شاہراہ پر فیول ٹینکرز میں خوفناک آگ بھڑک اْٹھی، دیکھتے ہی دیکھتے آگ نے دیگر آئل ٹینکرز اور اطراف میں موجود گاڑیوں کو بھی اپنی لپیٹ میں لے لیا، 4 کاریں اور 3 ٹرک بھی جل کر خاکستر ہوگئے جبکہ قریبی دکانوں اور گھروں کو بھی شدید نقصان پہنچا ہے، کابل کے کئی علاقوں کی بجلی کئی گھنٹوں تک معطل رہی، فائر بریگیڈ کے عملے نے سخت جدوجہد کے بعد آگ پر قابو پالیا۔

ہلاک اور زخمی ہونے والوں کو قریبی اسپتال منتقل کردیا گیا ہے جہاں مزید 2 افراد کی حالت نازک بتائی جارہی ہے، آگ لگنے کی حتمی وجہ معلوم نہیں ہوسکی اور واقعے کی تحقیقات جاری ہیں۔

افغان سیکورٹی حکام کی جانب سے طالبان کے راکٹ حملے کو ٹینکرز میں آگ لگنے کی وجہ بتایا گیا تھا تاہم طالبان نے واقعے میں ملوث ہونے کی تردید کی ہے۔

دوسری جانب قلات میں پولیس چیک پوسٹ پر طالبان حملے میں 3 پولیس اہلکار ہلاک اور 2 زخمی ہوگئے، پولیس نے جوابی کارروائی میں 9 طالبان مزاحمت کاروں کو ہلاک کرنے کا دعویٰ کیا ہے تاہم طالبان نے اس دعوے کی سختی سے مسترد کیا ہے۔

دریں اثناء غزنی میں بھی طالبان جنگجووؤں نے فوجی چیک پوسٹ پر حملہ کیا، سیکورٹی فورسز اور طالبان کے درمیان جھڑپ 2 گھنٹے سے زائد جاری رہی، حکام کا کہنا ہے کہ 30 سے زائد فوجی اہلکار لاپتا ہوگئے ہیں، بھاری نقصان کی بھی اطلاعات ہیں۔