شمال مشرقی شام میں جولانی عناصر اور کرد فورسز کے درمیان جھڑپیں

🗓️ 20 جنوری 2025

سچ خبریں:شمال مشرقی شام کے علاقے دیر الزور کے مضافات میں دہشت گرد گروہ جولانی کے عناصر اور شامی ڈیموکریٹک فورسز (قسد) کے درمیان شدید جھڑپیں ہوئیں۔

شامی سرکاری ٹیلی ویژن کی رپورٹ کے مطابق، یہ مسلح جھڑپیں ابوحمام اور غرانیج کے علاقوں میں ہوئیں، جہاں جولانی کے عناصر نے شمال مشرقی شام کے علاقوں میں اپنی موجودگی کو بڑھانے کے لیے لشکر کشی کی۔

یہ بھی پڑھیں: شمالی شام میں ترکی کے حمایت یافتہ عناصر اور کرد فورسز کے درمیان شدید جھڑپیں؛100 سے زائد ہلاکتیں

واضح رہے کہ جولانی کے عناصر نے مشرقی حلب، سد تشرین، اور دیر الزور کے محاذوں پر اپنی جنگی مشینری تعینات کی ہے، ان کے عزائم قسد کے زیر کنٹرول علاقوں پر قبضہ حاصل کرنے کے ہیں، جو حالیہ برسوں میں کرد فورسز کے زیر انتظام رہے ہیں۔

یاد رہے کہ شام میں جاری تنازعے کے دوران، خاص طور پر بشار الاسد حکومت کے سقوط کے بعد، قسد فورسز اور ترکی کے حمایت یافتہ گروہوں کے درمیان سد تشرین اور دیگر علاقوں میں شدید لڑائیاں دیکھنے میں آئیں۔

یاد رہے کہ جولانی کے دہشت گرد عناصر ان علاقوں پر قبضہ حاصل کرنے کی کوشش کر رہے ہیں جہاں اس وقت قسد کے زیر انتظام انتظامیہ موجود ہے۔

درایں اثنا قسد کے کمانڈر مظلوم عبدی نے حالیہ بیانات میں اعلان کیا کہ کرد فورسز اپنے ہتھیار نہیں ڈالیں گی،عبدی نے ترکی پر شام کے شمال مشرقی علاقوں میں اپنی موجودگی کو وسعت دینے کے الزامات عائد کیے۔

انہوں نے دعویٰ کیا کہ ترکی کا مقصد عین العرب پر قبضہ کر کے اپنے زیر کنٹرول علاقوں کو مزید مضبوط بنانا ہے،عبدی نے اس بات پر زور دیا کہ قسد تنازعات کو گفت و شنید کے ذریعے حل کرنے کی خواہش رکھتی ہے، لیکن ترکی کی جارحانہ پالیسیوں کو نظر انداز نہیں کیا جا سکتا۔

واضح رہے کہ شمالی شام میں ترکی کے حمایت یافتہ عناصر اور قسد کے درمیان جاری تنازعات نے خطے میں عدم استحکام کو مزید بڑھا دیا ہے۔

ترکی عین العرب سمیت کئی دیگر اہم علاقوں کو اپنے زیر تسلط لانے کی کوشش میں ہے جبکہ قسد اور اس کے حامی اس توسیع کو روکنے کے لیے پرعزم ہیں۔

مزید پڑھیں: شام پر قابض دہشت گردوں کی خفیہ کالز؛پوشیدہ طور پر تشدد کرو

شام کے شمال مشرقی علاقے میں جاری یہ تنازعات خطے میں ایک بڑے انسانی اور جغرافیائی بحران کی طرف اشارہ کر رہے ہیں۔ جولانی عناصر کی نقل و حرکت اور ترکی کی توسیعی پالیسی خطے کے امن کے لیے ایک بڑا چیلنج ہے جبکہ قسد اپنی مزاحمت جاری رکھنے کے لیے تیار ہے۔