انتہا پسند صیہونی وزیر کی غزہ جنگ بندی کے امریکی منصوبے کی مخالفت

?️ 2 جون 2025

سچ خبریں:انتہا پسند صیہونی وزیر ایتمار بن گویر نے امریکہ کے خصوصی ایلچی اسٹیو وِٹکاف کی غزہ جنگ بندی تجویز کی مخالفت کی ہے، جبکہ حماس نے اسے قابلِ مذاکرہ منصوبہ قرار دیا ہے۔

صیہونی حکومت کے انتہا پسند وزیر ایتمار بن گویر نے امریکہ کے خصوصی ایلچی اسٹیو وِٹکاف کی جانب سے پیش کیے گئے غزہ میں جنگ بندی کے منصوبے کی مخالفت کر دی ہے۔

یہ بھی پڑھیں:غزہ میں جنگ بندی کے امریکی منصوبے کی تفصیلات

الجزیرہ نیوز چینل کی رپورٹ کے مطابق، صیہونی میڈیا نے اطلاع دی ہے کہ ایتمار بن گویر نے اپنے بیان میں واضح کیا کہ وہ اسٹیو وِٹکاف کے جنگ بندی منصوبے کے خلاف ہیں، اور ان کا ماننا ہے کہ وزیر اعظم بنیامین نیتن یاہو کی جانب سے اس منصوبے پر تعاون ایک بڑی غلطی ہے۔

بن گویر نے دعویٰ کیا کہ حماس جنگ بندی کا فائدہ اٹھا کر خود کو دوبارہ منظم اور مسلح کرے گی، اس لیے ان کے بقول، "واحد حل” حماس کو مکمل طور پر ختم کرنا ہے۔

اپنے مزید بیانات میں انہوں نے کہا کہ میری فکر صرف غزہ میں موجود اسرائیلی قیدیوں تک محدود نہیں، بلکہ میں اپنے بچوں اور اسرائیلی فوجیوں کی سلامتی کے بارے میں بھی پریشان ہوں۔

دوسری جانب، فلسطینی مزاحمتی تنظیم حماس کے رہنما باسم نعیم نے المیادین کو دیے گئے انٹرویو میں کہا ہے کہ حماس نے اسٹیو وِٹکاف کے پیش کردہ منصوبے کو مسترد نہیں کیا بلکہ گزشتہ ہفتے اس پر اصولی اتفاق ظاہر کر دیا تھا، اور اسے ایک قابلِ مذاکرہ تجویز کے طور پر قبول کیا ہے۔

مزید پڑھیں:غزہ میں جنگ بندی کے امریکی منصوبے کی حقیقیت ؛عطوان کی زبانی

باسم نعیم کے مطابق صیہونی فریق نے جو ردعمل دیا ہے، وہ ان نکات سے ہم آہنگ نہیں جو ہمارے ساتھ طے پائے تھے، اور یہ منصوبہ ہماری قوم کی بنیادی ضروریات کو بھی پورا نہیں کرتا۔