سینٹکام کا 11 علاقائی ممالک کے فوجی حکام کے ساتھ اجلاس

?️ 2 جولائی 2026

سچ خبریں:امریکہ، جسے خود خطے میں عدم استحکام اور جنگی کشیدگی کا بنیادی سبب قرار دیا جاتا ہے، نے سلامتی کے چیلنجوں کے حوالے سےخطہ کے 11 ممالک کے فوجی حکام کے ساتھ ایک فوجی اجلاس منعقد کیا۔

امریکہ کی مرکزی فوجی کمان سینٹکام نے اردن، مصر، بحرین، کویت، لبنان، عمان، قطر، سعودی عرب، شام، متحدہ عرب امارات اور یمن کے فوجی حکام کے ساتھ علاقائی سلامتی، فوجی تعاون، آبنائے ہرمز میں جہاز رانی اور فضائی دفاعی تعاون پر اجلاس منعقد کیا۔

آر ٹی کے مطابق امریکہ کی دہشت گرد افواج کی مرکزی کمان، جسے سینٹکام کہا جاتا ہے، نے اعلان کیا ہے کہ اس کے کمانڈر بریڈ کوپر نے اردن، مصر، بحرین، کویت، لبنان، عمان، قطر، سعودی عرب، شام، متحدہ عرب امارات اور یمن کی خود ساختہ حکومت کے فوجی حکام کے ہمراہ ایک اجلاس منعقد کیا۔

اجلاس کے دوران خطے کی تازہ صورتحال اور شریک ممالک کے درمیان فوجی تعاون کو مزید مضبوط بنانے کے مختلف پہلوؤں پر مشاورت کی گئی۔

اجلاس میں شریک حکام نے آبنائے ہرمز میں بحری جہازوں کی آزادانہ آمد و رفت کو یقینی بنانے کے اپنے عزم کا بھی اعادہ کیا۔

بریڈ کوپر نے خطے میں امریکہ کی جنگی پالیسیوں کا کوئی ذکر کیے بغیر کہا کہ ہم اپنے علاقائی شراکت داروں کی حمایت جاری رکھیں گے۔ ہم سب خطے میں سلامتی اور استحکام کے قیام کے لیے پرعزم ہیں۔

انہوں نے ایران کے میزائل اور ڈرون حملوں کے مقابلے میں امریکی فوجی اڈوں کے دفاع میں پیش آنے والی ناکامیوں کا ذکر کیے بغیر دعویٰ کیا کہ امریکہ اور اس کے علاقائی شراکت دار دنیا کے سب سے بڑے اور جدید میزائل اور فضائی دفاعی نظام خطے میں چلا رہے ہیں۔ گزشتہ جنوری کے دوران سینٹکام اور خطے کے ممالک نے فضائی دفاع، معلومات کے تبادلے اور بروقت انتباہ کے لیے ایک نیا مربوط دفاعی نیٹ ورک بھی قائم کیا تھا۔