یوکرین اور برطانیہ کی جانب سے روسی جنگی طیارہ میگ-31 کو اغوا کرنے کی کوشش ناکام

?️ 12 نومبر 2025

یوکرین اور برطانیہ کی جانب سے روسی جنگی طیارہ میگ-31 کو اغوا کرنے کی کوشش ناکام

 روسی خفیہ ادارے ایف ایس بی نے اعلان کیا ہے کہ یوکرین اور برطانیہ کی مشترکہ منصوبہ بندی کے تحت ایک روسی میگ–31 جنگی طیارہ، جو ہائپرسونک میزائل کینژال سے لیس تھا، اغوا کرنے کی کوشش کو ناکام بنا دیا گیا ہے۔

خبررساں ایجنسی نووستی کے مطابق ایف ایس بی نے اپنے بیان میں کہا کہ یوکرین کی ملٹری انٹیلیجنس نے روسی پائلٹس کو بھاری مالی لالچ دے کر طیارہ ہتھیانے کی منصوبہ بندی کی تھی۔ اس مقصد کے لیے روسی پائلٹس کو تین ملین ڈالر اور کسی مغربی ملک کی شہریت کی پیشکش کی گئی تھی۔

روس کے سیکیورٹی ادارے نے دعویٰ کیا کہ منصوبے کے تحت میگ–31 طیارہ اغوا کے بعد نیٹو کے رکن ملک رومانیہ کے ایک ہوائی اڈے کی طرف لے جایا جانا تھا۔ تاہم روسی انٹیلیجنس نے یہ کارروائی بروقت کارروائی کرکے ناکام بنا دی۔

میگ–31 پر نصب ہائپرسونک کینژال میزائل روس کے اُن جدید ترین اسلحہ نظاموں میں شمار ہوتے ہیں جنہیں روسی صدر ولادیمیر پوتین نے 2018 میں متعارف کرایا تھا۔ پوتین کے مطابق کینژال میزائل امریکی میزائل دفاعی نظام کو چکمہ دینے کی صلاحیت رکھتا ہے اور دنیا کے کسی بھی مقام کو نشانہ بنا سکتا ہے۔

روس اور یوکرین کے درمیان جاری جنگ کے تناظر میں اس تازہ دعوے نے خطے کی سیکیورٹی صورتحال پر نئی بحث چھیڑ دی ہے، جبکہ مغربی ممالک کی جانب سے تاحال اس واقعے پر کوئی فوری ردِعمل سامنے نہیں آیا۔