کنیڈا میں بھارتی طالب علم کا قتل

?️ 12 اپریل 2022

سچ خبریں:کنیڈا میں ایک ہندوستانی طالب علم کا گولی مارکر قتل کردیا گیا۔
کنیڈا میں ایک ہندوستانی طالب علم کے قتل کیے جانے کے بعد اس ملک کی پولیس نے بتایا کہ مقتول کی شناخت کارتک واسودیو (21)کے طورپر ہوئی ہے جو ایک ریستوران میں کام کے دوران جب باہرآیا،تب گھات لگائے بیٹھے حملہ آوروں نے شیربورن ٹی ٹی سی میٹرو اسٹیشن کے باہر اسے گولی مارکر قتل کردیا۔

انہوں نے بتایا کہ گولی لگنے کے بعد زخمی کارتک کو اسپتال لے جایا گیا،جہاں اس کی موت ہوگئی، تاہم پولیس ٹیم اس معاملے کی جانچ کررہی ہے ،بھارتی وزیر خارجہ ایس جے شنکر نے کارتک کی موت پر دکھ کا اظہار کیا اور اس کے کنبے کے تئیں گہری تعزیت کا اظہارکیا ہے ۔

ٹورنٹو میں ہندوستان کے قونصل خانے نے ٹویٹ کیا کہ ٹورنٹو میں ایک شوٹنگ کے واقعہ میں ہندوستانی طالب علم کارتک واسودیو کا بدقسمتی سے قتل ہونے سے ہم سکتے میں ہیں،ہم سوگوار لواحقین کے رابطے میں ہیں اور لاش کو جلد ہی واپس لانے کے لئے ہر ممکن مدد مہیا کریں گے ۔

پولیس نے بتایا کہ کارتک کنیڈا میں مینجمنٹ کی پڑھائی کررہا تھا اور خدشہ ظاہر کیا جارہا ہے کہ اس کا قتل لوٹ مار کی کوشش سے کیا گیاہے جبکہ کارتک کے والد جتیش واسودیو نے کہا کہ ٹورنٹو میں کارتک کو تین سال سخت محنت کے بعد سینیکا کالج میں داخلے کے لئے منظوری ملی تھی جہاں وہ عالمی تجارتی نظام کی پڑھائی کرنا چاہتا تھا،داخلہ مل جانے پر وہ بہت خوش تھا اور پورا کنبہ پرجوش تھا، انہوں نے کہا کہ کارتک کی موت کی خبر پولیس کے ذریعہ دی گئی۔