ٹرمپ کی تجارتی پالیسی چین کے حق میں، افریقی ممالک چینی سرمایہ کاری کی طرف مائل

ٹرمپ کی تجارتی پالیسی چین کے حق میں، افریقی ممالک چینی سرمایہ کاری کی طرف مائل

 امریکہ کے  صدر ڈونلڈ ٹرمپ کی جانب سے عائد کردہ نئے تجارتی محصولات نے افریقی ممالک کو شدید مالی دباؤ میں مبتلا کر دیا ہے۔ ماہرین کا کہنا ہے کہ ان اقدامات سے چین کو خطے میں قدم جمانے کا نادر موقع مل گیا ہے۔

امریکی خبررساں ادارے سی این این کے مطابق، افریقی ممالک بالخصوص لیبیا، جنوبی افریقا، الجزائر اور تونس ان چند ممالک میں شامل ہیں جنہیں امریکہ کی نئی تجارتی پالیسی کے تحت 25 سے 30 فیصد تک کے بھاری محصولات کا سامنا ہے۔ مزید 18 افریقی ممالک پر 15 فیصد تک کے محصولات عائد کیے گئے ہیں۔

نیجریا کے ماہر اقتصادیات بیسمارک ریوان نے سی این این کو بتایا کہ یہ اقدامات ہمیں براہ راست چین کی طرف دھکیل رہے ہیں۔

جنوبی افریقہ نے ٹرمپ انتظامیہ کے فیصلے کو غیر منصفانہ قرار دیتے ہوئے کہا ہے کہ یہ فیصلے درست تجارتی اعداد و شمار پر مبنی نہیں ہیں۔

اس صورتحال سے فائدہ اٹھاتے ہوئے چین نے اعلان کیا ہے کہ وہ افریقی ممالک کے ساتھ بغیر محصول کے تجارت کو فروغ دے گا۔ چین نے جون میں اعلان کیا کہ وہ بیشتر افریقی شراکت داروں پر درآمدی محصولات ختم کر دے گا تاکہ امریکہ کی پالیسیوں کے اثرات کو کم کیا جا سکے۔

جنوبی افریقی محقق نئو لتسوالو نے کہا کہ افریقی ممالک کے پاس جنوب-جنوب تجارتی تعلقات بڑھانے کا اس سے بہتر وقت کبھی نہیں آیا۔ اب ان کے لیے بہترین متبادل چین ہے، جو امریکہ کی جگہ لے سکتا ہے۔

انہوں نے مزید کہا امریکہ آہستہ آہستہ عالمی قیادت سے محروم ہو رہا ہے اور جتنے زیادہ ممالک واشنگٹن پر انحصار کم کریں گے، چین کے لیے متبادل بننے کے امکانات اتنے ہی زیادہ ہوں گے۔

بلومبرگ کے مطابق، سٹی گروپ کے علاقائی سربراہ نے بھی تصدیق کی ہے کہ ٹرمپ کی تجارتی پالیسی کے بعد افریقی ممالک امریکہ سے دور ہو رہے ہیں اور تجارت کا رخ چین کی طرف مڑ رہا ہے۔

چینی اخبار ساوتھ چائنا مارننگ پوسٹ نے رپورٹ کیا ہے کہ چین نے اپنی خوراکی ضروریات اور خام مال کی فراہمی کے تحفظ کے لیے افریقہ میں اربوں یوان کی سرمایہ کاری کا آغاز کر دیا ہے۔

صرف پچھلے ماہ، دو بڑی چینی سرکاری کمپنیوں نے 350 ملین ڈالر مالیت کے معاہدے کیے ہیں تاکہ انگولا میں زرعی زمین پر قبضہ حاصل کیا جا سکے اور اسے ترقی دی جا سکے۔

چینی کمپنی سینوہائڈرو نے 25 سالہ معاہدے کے تحت 30 ہزار ہیکٹر زمین حاصل کی ہے جہاں وہ ایک بڑی غلہ بیس تیار کرے گی۔ اس زمین سے اگائے گئے تقریباً 60 فیصد اجناس چین کو براہ راست برآمد کیے جائیں گے۔

دوسری کمپنی سِٹِک گروپ نے اعلان کیا ہے کہ وہ پانچ سال کے دوران 100 ہزار ہیکٹر زمین پر سویا بین اور مکئی کی کاشت پر 250 ملین ڈالر کی سرمایہ کاری کرے گی۔

یہ اقدامات نہ صرف چین کو خوراکی سلامتی فراہم کریں گے بلکہ افریقہ میں اس کے اثر و رسوخ کو مزید مستحکم کریں گے، جہاں اب امریکہ کی موجودگی بتدریج کم ہوتی جا رہی ہے