ٹرمپ منصوبہ، نیتن یاہو کی بقا یا اتحاد کا زوال؟

ٹرمپ منصوبہ، نتن یاہو کی بقا یا اتحاد کا زوال؟

 امریکی صدر ڈونلڈ ٹرمپ کے تجویز کردہ منصوبے کے بعد اسرائیلی سیاسی منظرنامہ ہلچل میں ہے۔ وزیر اعظم بینیامن نتن یاہو نے امریکہ کے دورے کے فوراً بعد کابینہ کا ہنگامی اجلاس بلایا، مگر حکومت کے سخت گیر اراکین نے منصوبے پر شدید تحفظات کا اظہار کیا ہے۔

اسرائیلی وزیرِ داخلہ ایتمار بین گوئیر نے خبردار کیا ہے کہ اگر قیدیوں کی رہائی کے بعد حماس اپنی موجودگی برقرار رکھتی ہے تو ان کی جماعت اتحاد کا حصہ نہیں رہے گی۔ بین گوئیر کا کہنا ہے کہ وہ حماس کے بقا پر مبنی کسی صورتِ حال میں شریک نہیں بنیں گے۔

وزیرِ خزانہ بَتسلئیل سموتریچ نے بھی کہا کہ بغیر فوجی دباؤ کے مذاکرات ایک بڑی غلطی ہوں گے  ان کے بقول اس سے حماس کو تقویت ملے گی اور اسرائیل کا موقف کمزور ہوگا۔ انہوں نے خدشہ ظاہر کیا کہ ایسا ہونے سے حتیٰ کہ قیدیوں کی رہائی کا عمل بھی متاثر ہو سکتا ہے۔

کابینہ اجلاس کا اہم مقصد نیا شاباک (اندرونی سیکیورٹی) سربراہ ڈیوڈ زِینی کی تعیناتی تھی، تاکہ سخت گیر اراکین کے ممکنہ احتجاج اور حکومت کے اندرونی اختلافات سے پہلے یہ نام منظور ہو جائے۔

سیاستدانوں کے درمیان یہ اختلاف اس بات کی علامت ہے کہ ٹرمپ کا منصوبہ نہ صرف قیدیوں کی رہائی اور جنگ بندی سے متعلق فیصلوں پر اثر انداز ہو سکتا ہے بلکہ اسرائیلی حکومتی اتحاد کو بھی ڈرامائی طور پر بدل سکتا ہے  ممکن ہے بعض جماعتیں اتحاد چھوڑ دیں یا کابینہ کمزور عارضی شکل اختیار کر لے۔