واشنگٹن ڈی سی میں نیشنل گارڈ کی تعیناتی پر احتجاج میں اضافہ

واشنگٹن ڈی سی میں نیشنل گارڈ کی تعیناتی پر احتجاج میں اضافہ

 امریکی صدر ڈونلڈ ٹرمپ نے واشنگٹن ڈی سی میں بڑھتے جرائم کے دعوے کو بنیاد بنا کر وفاقی پولیس کی موجودگی بڑھانے اور نیشنل گارڈ تعینات کرنے کا اعلان کیا، جس پر شہر میں شدید احتجاج شروع ہوگیا ہے۔

امریکی ویب سائٹ "اکسیوس” کے مطابق ٹرمپ نے کہا کہ وہ 800 نیشنل گارڈ اہلکاروں کو واشنگٹن بلا رہے ہیں اور ضرورت پڑنے پر فوج کو بھی تعینات کر سکتے ہیں۔ یہ واحد نیشنل گارڈ یونٹ ہے جو براہِ راست صدر کو رپورٹ کرتا ہے۔

اکسیوس نے اسے پائتخت کا "قبضہ” قرار دیتے ہوئے بتایا کہ ہنگامی صورتحال کے اعلان کے بعد وفاقی پولیس کی تعداد میں نمایاں اضافہ ہو گیا ہے۔ الجزیرہ کے مطابق، وائٹ ہاؤس کے قریب جمع مظاہرین نے ٹرمپ کے اس اقدام کو مسترد کرتے ہوئے سخت نعرے بازی کی۔

ڈی سی کو آزاد کرو تحریک کے ڈائریکٹر، کیا کاترجی، نے کہا کہ یہ فیصلہ نہ صرف شہر کے شہریوں کے حقوق کے خلاف ہے بلکہ مزید بڑے تصادم کا باعث بنے گا۔ ایک طالبعلم، اماری جیک، نے اسے ٹرمپ کی طویل المیعاد خواہش وائٹ ہاؤس کے اطراف مکمل کنٹرول — کا پہلا قدم قرار دیا۔

ٹرمپ کا مؤقف ہے کہ مقامی پولیس امن و امان قائم رکھنے میں ناکام رہی ہے، اور جرائم کی بلند شرح وفاقی سلامتی کو ناقابلِ قبول خطرے میں ڈال رہی ہے۔ اپنے حامیوں سے خطاب میں انہوں نے دعویٰ کیا کہ وہ "پائتخت واپس لے رہے ہیں” اور یہ کارروائی جرائم پیشہ گروہوں اور منشیات فروشوں کے خلاف مہم کا حصہ ہے۔

سی این این نے لکھا کہ یہ پہلا موقع نہیں جب ٹرمپ نے بحران یا ہنگامی صورتحال کو اپنے اقدامات کے جواز کے طور پر استعمال کیا ہے۔ اس سے قبل بھی وہ معیشت، توانائی اور سرحدی امیگریشن کے معاملات میں قومی ہنگامی حالت کا اعلان کر چکے ہیں تاکہ اپنے اختیارات میں اضافہ کر سکیں۔

سی این این نے فوج کو پولیس کے کردار میں لانے کو آمرانہ حکومتوں کا حربہ قرار دیتے ہوئے کہا کہ یہ کسی آمر کا پہلا قدم ہوتا ہے کہ وہ دارالحکومت کی سڑکوں پر فوج اتار دے۔ ڈیموکریٹک ارکانِ کانگریس نے خبردار کیا ہے کہ یہ آمریت کی نرم شروعات ہے۔