متحدہ عرب امارات کے یمن میں غیر ملکی کرائے کے فوجی

🗓️ 15 جولائی 2021

سچ خبریں:یمن کی مستعفی حکومت کے سرکاری عہدے دار نے انکشاف کیا ہے کہ متحدہ عرب امارات نے یمن کے جنوبی صوبوں میں اپنا اثر و رسوخ بڑھانے کے لئے غیر ملکی کرائے کے فوجیوں کو یمن کے جزیرے سقطری بھیجا ہے۔
یمنی نیوز ایجنسی (وائی این پی) کے مطابق مستعفی یمنی حکومت کے ایک عہدیدار نے بدھ کے روز انکشاف کیا ہے کہ متحدہ عرب امارات نے یمن کے جزیرے سقطری میں غیرملکی کرائے کے فوجی بھیجے ہیں،عبدربہ منصور ہادی کی معزول حکومت کے وزیر برائے انٹیلی جنس کے مشیر مختار الرحبی نے اس بات کی تصدیق کی ہے کہ ابو ظہبی نے جزیرے پر اپنا اثر و رسوخ مستحکم کرنے کی کوششوں کے حصے کے طور پر مختلف قومیتوں کی فوج سقطری جزیرے میں بھیجی ہے۔

جزیرے سے باخبر مقامی ذرائع نے بھی اس بات کی تصدیق کی کہ فوجیوں کے ایک نئے گروپ سے بھرا ہوا اماراتی طیارہ سقطری پہنچا جس میں موجود افراد ہوائی اڈے کے قریب اور دیگر مقامات پر تعینات کیے گئے،واضح رہے کہ یمن کے جنوبی صوبوں میں اماراتی اور سعودی دھڑوں کے درمیان بڑھتے ہوئے تنازعہ کے پیش نظر ابوظہبی یمن کے جزیرے پر اپنی فوجی موجودگی کو مستحکم کرنے ، اس کی دولت پر قابو پانے اور جزیرے پر سعودی یا وفادار قوتوں کی موجودگی کو ختم کرنے کی کوشش کر رہے ہیں۔

واضح رہے کہ حال ہی میں دبئی پولیس کے نائب سربراہ نے کہا کہ سعودی عرب نے ہمیں یمن جنگ میں استعمال کیا ہے اور اب جب صلح کی بات آئی ہے تو قطر کا سہارہ لیا ہے۔