فلم وائس آف ہند رجب کو وینس فلم فیسٹیول میں ۲۴ منٹ تک کھڑے ہو کر داد سے نوازا گیا

فلم وائس آف ہند رجب کو وینس فلم فیسٹیول میں ۲۴ منٹ تک کھڑے ہو کر داد سے نوازا گیا

 غزہ کی ۶ سالہ شہید بچی کی دردناک کہانی پر مبنی فلم وائس آف ہند رجب  نے وینس فلم فیسٹیول میں شائقین اور ناقدین کے دل جیت لیے۔ فلم کی نمائش کے بعد حاضرین نے ۲۴ منٹ تک کھڑے ہو کر تالیاں بجائیں اور متاثر کن انداز میں اپنی حمایت کا اظہار کیا۔

رپورٹ کے مطابق، کئی بین الاقوامی فنکاروں اور سینماکاروں نے ہند رجب کی تصویر اٹھا کر ریڈ کارپٹ پر اس کی یاد کو خراجِ عقیدت پیش کیا جبکہ ناظرین نے فلسطین کے پرچم بلند کرتے ہوئے غزہ کے عوام سے اظہار یکجہتی کیا۔

فلم کے اختتام پر سینما ہال میں رقت آمیز مناظر دیکھنے کو ملے، جہاں کئی افراد اور فلم کی ٹیم اشکبار ہو گئی۔ بعدازاں "فلسطین کی آزادی” کے نعرے بھی گونج اٹھے۔

یہ فلم، جو تونسی نژاد ہدایتکارہ کوثر بن ہنیہ نے بنائی ہے، وینس فلم فیسٹیول کے ۷۹ویں ایڈیشن میں مقابلے کے حصے کے طور پر نمائش کے لیے پیش کی گئی اور گولڈن لائن ایوارڈ کے لیے بھی امیدوار ہے۔

وائس آف ہند رجب ایک دستاویزی-ڈرامائی فلم ہے جو ۶ سالہ فلسطینی بچی ہند رجب کے المناک انجام پر روشنی ڈالتی ہے۔ ہند اپنی فیملی کے اسرائیلی فضائی حملے میں جاں بحق ہونے کے بعد ایک تباہ شدہ گاڑی میں زندہ بچی اور اس نے ہلال احمر کو فون کر کے مدد کی اپیل کی۔ لیکن ایک گھنٹے سے زائد انتظار کے باوجود جب ایمبولینس پہنچی تو وہ بھی اسرائیلی حملے کا نشانہ بن گئی اور امدادی کارکن شہید ہو گئے۔ بالآخر، ہند رجب کو بھی اسرائیلی فوجیوں نے براہِ راست فائرنگ کر کے شہید کر دیا۔