فرانسیسی شائقین کی غزہ سے اظہارِ یکجہتی، اسٹیڈیم میں احتجاجی بینرز

فرانسیسی شائقین کی غزہ سے اظہارِ یکجہتی، اسٹیڈیم میں احتجاجی بینرز

 ذرائع ابلاغ نے اطلاع دی ہے کہ فرانس میں فٹبال میچ کے دوران شائقین نے بڑے بڑے بینرز اٹھا کر فلسطینی عوام کے ساتھ اپنی یکجہتی کا اظہار کیا۔ یہ واقعہ ’’المپیک مارسیاور پیرس ایف سی کے درمیان کھیلے گئے میچ میں پیش آیا۔

اس سے قبل فرانسیسی صدر ایمانوئل میکرون اعلان کر چکے ہیں کہ فرانس رواں سال ستمبر میں اقوام متحدہ کی جنرل اسمبلی میں فلسطین کو باضابطہ طور پر ایک آزاد ریاست تسلیم کرے گا۔ ان کا کہنا تھا کہ یہ فیصلہ مشرق وسطیٰ میں ایک پائیدار اور منصفانہ امن کے لیے فرانس کی تاریخی ذمہ داری کے تحت کیا گیا ہے۔

میکرون نے ایک بیان میں فوری جنگ بندی، یرغمالیوں کی رہائی اور غزہ کے عوام کے لیے بڑے پیمانے پر انسانی امداد کی فراہمی پر زور دیا تھا۔

یاد رہے کہ اسرائیل نے 7 اکتوبر 2023 سے غزہ پر تباہ کن جنگ مسلط کر رکھی ہے جس کے نتیجے میں ہزاروں فلسطینی شہری، جن میں بڑی تعداد خواتین اور بچوں کی ہے، شہید اور زخمی ہو چکے ہیں۔ اس کے علاوہ خطے میں قحط اور انسانی بحران نے صورتحال کو مزید سنگین بنا دیا ہے۔

عالمی عدالتِ انصاف اور اقوام متحدہ کی قراردادوں کو نظر انداز کرتے ہوئے تل ابیب نسل کشی پر مبنی اپنی کارروائیاں جاری رکھے ہوئے ہے۔ اس کے باوجود اسرائیلی حکام نے اعتراف کیا ہے کہ وہ اپنے بنیادی مقاصد، یعنی حماس کو ختم کرنے اور اپنے یرغمالیوں کی رہائی، میں ناکام رہے ہیں۔