غزہ میں 15 سال کے محاصرے کے بعد تباہ کن صورتحال:اقوام متحدہ

🗓️ 3 جولائی 2022

سچ خبریں:اقوام متحدہ نے اپنی ایک رپورٹ میں غزہ کی پٹی کی ناکہ بندی کو فوری طور پر ہٹانے اور تمام پابندیاں اٹھانے نیز اس علاقے میں تباہ شدہ فیکٹریوں کی تعمیر نو کا مطالبہ کیا ہے۔
رائے الیوم اخبار کی رپورٹ کے مطابق مقبوضہ فلسطینی علاقوں میں رابطہ کاری کے انسانی امور کے دفتر (او سی ایچ اے) نے ایک رپورٹ میں اعلان کیا ہے کہ غزہ کی پٹی میں 15 سال کی زمینی، سمندری اور فضائی ناکہ بندی کے بعد صورتحال تباہ کن ہو گئی ہے، رپورٹ میں کہا گیا ہے کہ غزہ کی پٹی کی ناکہ بندی نے اس علاقہ میں غربت اور بے روزگاری کی شرح کو بلند ترین سطح پر پہنچا دیا ہے، فلسطینی معیشت کو تباہ کر دیا ہے اور ان میں سے 50 فیصد کا انحصار بین الاقوامی امداد پر ہے۔

رپورٹ میں غزہ کی پٹی کی ناکہ بندی کے بارے میں اقوام متحدہ کی تشویش اور صیہونی حکومت کی ذمہ داریوں کی خلاف ورزی کا ذکر کرتے ہوئے، غزہ کی ناکہ بندی کو اٹھانے کی ضرورت پر زور دیا گیا ہے نیز سلامتی کونسل کی قرارداد نمبر 1860 پر زور دیا گیا ہے،اوچا نے اپنی رپورٹ میں یہ بھی کہا ہے کہ غزہ کی پٹی کی ناکہ بندی اب تک اس علاقہ کے سیکڑوں باشندوں کی موت کا سبب بن چکی ہے۔