غزہ میں صفائی کا بحران، قابض قوتوں کی بربریت نمایاں

غزہ میں صفائی کا بحران، قابض قوتوں کی بربریت نمایاں

 فلسطینی سیاسی تجزیہ کار نے غزہ میں صحت کے شعبے کی تباہ کن صورتحال اور اسپتالوں کے خوفناک حالات کو قابض صہیونی حکومت کی منظم پالیسی قرار دیا ہے۔

 فلسطینی تجزیہ کار امجد بشکار نے کہا کہ اسپتالوں سے موصول ہونے والی تصاویر انسانی المیے کی بدترین جھلک پیش کرتی ہیں، جسے اسرائیلی کابینہ کی انتہا پسندانہ پالیسی نے جنم دیا ہے۔ ان کے بقول، علاج گاہوں کو نشانہ بنانا اور تباہ کرنا محض اتفاق نہیں بلکہ ایک سوچے سمجھے منصوبے کا حصہ ہے، تاکہ فلسطینی معاشرے کو ٹکڑوں میں تقسیم کر کے مریضوں اور بچوں کو دباؤ کے آلے کے طور پر استعمال کیا جائے۔

انہوں نے مزید کہا کہ یہ صورتحال نہ صرف بین الاقوامی قوانین کی کھلی خلاف ورزی ہے بلکہ ایک مکمل نسل کشی ہے۔ عالمی برادری آج ایک بڑے اخلاقی و سیاسی امتحان سے گزر رہی ہے کہ آیا وہ انسانی اصولوں کا دفاع کرے گی یا اجتماعی سزا میں شریک ہو کر خطے اور دنیا کے امن کو خطرے میں ڈالے گی۔

رپورٹس کے مطابق، غزہ کا صحت کا نظام مکمل طور پر تباہ ہوچکا ہے۔ بیشتر اسپتال اسرائیلی بمباری، ایندھن کی قلت اور طبی آلات و ادویات کی شدید کمی کے باعث خدمات فراہم کرنے سے قاصر ہیں۔ وزارتِ صحت غزہ کے مطابق، اسپتال زخمیوں اور مریضوں کے سیلاب کو سنبھالنے کی سکت نہیں رکھتے۔

ادھر عالمی ادارہ صحت سمیت بین الاقوامی تنظیموں نے غزہ میں انسانی تباہی پر شدید تشویش ظاہر کرتے ہوئے خبردار کیا ہے کہ اگر اسپتالوں پر حملے اور امداد کی راہ میں رکاوٹیں برقرار رہیں تو اموات میں کئی گنا اضافہ ہوگا اور بے شمار زندگیاں بچانا ناممکن ہوجائے گا۔

اس صورتحال میں وہ مراکز جو زخمیوں کے لئے پناہ گاہ ہونی چاہئے تھیں، خود غزہ کے عوام کی اذیت اور المناک حالات کی تصویر بن چکے ہیں۔