غزہ میں بڑھتے انسانی بحران کا ذمہ دار اسرائیل ہے: فلسطینی میڈیا

غزہ میں بڑھتے انسانی بحران کا ذمہ دار اسرائیل ہے: فلسطینی میڈیا

غزہ کے سرکاری میڈیا دفتر نے خبردار کیا ہے کہ اگر انسانی امداد کی ترسیل پر عائد پابندیاں برقرار رہیں تو علاقہ سنگین انسانی بحران سے دوچار ہو سکتا ہے، جس کی ذمہ داری اسرائیلی قابض حکام پر عائد ہوتی ہے۔

عرب اخبار الشروق کے مطابق جاری بیان میں کہا گیا کہ امدادی سامان کی آمد میں رکاوٹ ڈالنا بین الاقوامی انسانی قوانین اور شہری آبادی کے تحفظ سے متعلق ذمہ داریوں کی کھلی خلاف ورزی ہے۔

بیان میں یہ بھی کہا گیا کہ عالمی امدادی ادارہ غزہ میں اپنی سرگرمیاں معطل کرنے پر غور کر رہا ہے، جس سے شہریوں میں تشویش پائی جاتی ہے۔ وضاحت کی گئی کہ اسرائیلی پابندیوں کے باعث یومیہ 25 امدادی ٹرکوں کی تعداد گھٹا کر صرف 5 کر دی گئی ہے، جس سے ہزاروں افراد کو فراہم کی جانے والی خوراکی سہولت متاثر ہو رہی ہے۔

مزید کہا گیا کہ امدادی اداروں پر دباؤ ڈالا جا رہا ہے کہ وہ خوراکی اشیا مصر کے بجائے 1948 کے مقبوضہ علاقوں سے خریدیں، جس سے اخراجات میں اضافہ اور امدادی عمل میں مزید رکاوٹیں پیدا ہو رہی ہیں۔

دوسری جانب انسانی حقوق کی تنظیم  نے رپورٹ کیا ہے کہ اسرائیلی حکام یکم مارچ سے غزہ اور مغربی کنارے میں 37 بین الاقوامی غیر سرکاری تنظیموں کی سرگرمیاں محدود کرنے کا ارادہ رکھتے ہیں۔ امدادی اداروں کا کہنا ہے کہ نئی شرائط انسانی کام کے بنیادی اصولوں، خصوصاً غیر جانبداری اور خودمختاری، کے منافی ہیں۔

ادھر غزہ میں طبی امداد کے شعبے سے وابستہ عہدیدار بسام زقوت نے کہا ہے کہ صحت کا نظام مہلک جمود کا شکار ہے۔ ان کے مطابق کینسر کے تقریباً 50 فیصد مریضوں کو علاج کے لیے بیرونِ غزہ جانا پڑتا ہے جبکہ 70 فیصد دائمی امراض کے مریض ادویات کی کمی کا سامنا کر رہے ہیں۔

فلسطینی حکام نے میڈیا سے اپیل کی ہے کہ وہ اس معاملے کو ذمہ داری اور توازن کے ساتھ اجاگر کریں اور ممکنہ بحران کی بنیادی وجہ یعنی امداد کی راہ میں حائل رکاوٹوں کو نمایاں کریں۔