عراق میں وزارت عظمی کے لئے پانچ امیدواروں کے نام زیر غور ہیں

?️ 19 نومبر 2025

عراق میں وزارت عظمی کے لئے پانچ امیدواروں کے نام زیر غور ہیں

لبنانی اخبار الاخبار نے اپنی تازہ رپورٹ میں انکشاف کیا ہے کہ عراق میں وزارتِ عظمیٰ کے منصب کے لیے پانچ امیدواروں کے نام سنجیدگی سے زیر غور ہیں اور سیاسی منظرنامے تین مختلف سمتوں میں آگے بڑھ سکتے ہیں۔ رپورٹ کے مطابق پارلیمانی انتخابات کے حتمی نتائج سامنے آتے ہی شیعہ اتحاد چارچوب ہم آہنگی نے خود کو پارلیمان کا سب سے بڑا بلاک قرار دیا، اگرچہ وزارتِ عظمیٰ کے امیدوار پر اس اتحاد کے اندر اختلافات موجود ہیں۔

اتحاد کی نئی مشاورتی کمیٹی امیدواروں کے انٹرویوز، ان کے پروگرام اور تجربے کا جائزہ لے رہی ہے۔ ذرائع کا کہنا ہے کہ اگرچہ میڈیا میں درجنوں نام سامنے آ رہے ہیں، اصل میں جن امیدواروں پر سنجیدگی سے بات ہو رہی ہے، ان میں محمد شیاع السودانی، حمید الشطری، محسن المندلاوی، اسعد العیدانی اور حیدر العبادی شامل ہیں۔

موجودہ وزیراعظم محمد شیاع السودانی نے دهوک میں ایک اجلاس کے دوران اپنی دوسری مدت کے لیے خواہش کا اظہار کیا اور کہا کہ یہ ان کا انتخابی حق ہے کیونکہ ان کے اتحاد نے سب سے زیادہ ووٹ حاصل کیے ہیں۔ تاہم رپورٹ کا کہنا ہے کہ نوری المالکی سمیت چارچوب ہم آہنگی کے کئی رہنما ان کی دوبارہ نامزدگی کے حق میں نہیں، جبکہ سیاسی تجزیہ کاروں کا کہنا ہے کہ وزیراعظم کے انتخاب پر بیرونی عوامل کا اثر بھی ناگزیر ہے۔

السودانی کے قریب سمجھے جانے والے سیاسی حلقوں کا دعویٰ ہے کہ چارچوب ہم آہنگی نے اختلافات کے باوجود جلد ہی اندرونی ہم آہنگی بحال کر لی ہے اور اسی اتحاد کے ذریعے نیا وزیراعظم طے پائے گا۔ دوسری جانب السودانی کے اتحاد کے ایک رہنما محمد الطائی کا کہنا ہے کہ ملکی روایات کے مطابق وزارتِ عظمیٰ کا حق اسی گروہ کو ہوتا ہے جو پارلیمان میں سب سے بڑا وزن رکھتا ہو، اور نوری المالکی و السودانی کے درمیان اختلافات کی خبریں بے بنیاد ہیں۔

الاخبار کے مطابق موجودہ حالات سے تین منظرنامے سامنے آ رہے ہیں: پہلا یہ کہ اگر اتفاق رائے پیدا ہو تو السودانی دوبارہ وزیراعظم بن سکتے ہیں، تاہم اس امکان میں کمی آتی جا رہی ہے۔ دوسرا یہ کہ کسی تکنیکی یا سیکیورٹی پس منظر کے حامل امیدوار، جیسے حمید الشطری، کو ایک متوازن حل کے طور پر لایا جائے۔ تیسرا امکان یہ ہے کہ اگر داخلی اختلافات بڑھتے گئے تو سابق وزیراعظم حیدر العبادی دوبارہ سامنے آسکتے ہیں۔

قابل ذکر ہے کہ عراق کے الیکشن کمیشن نے پیر کی شب انتخابات کے حتمی نتائج کا اعلان کیا جس کے مطابقچکے اتحاد نے سب سے زیادہ نشستیں حاصل کیں، جس کے بعد چارچوب ہم آہنگی نے خود کو پارلیمان کا سب سے بڑا بلاک قرار دیا۔