عراق میں داعش کے خطرناک رہنما کی گرفتاری

?️ 14 جولائی 2022

سچ خبریں:عراقی فوج سے وابستہ صوبہ الانبار کی آپریشن کمانڈ نے اس صوبہ کے رمادی شہر کے شمال میں داعش کے ایک خطرناک رہنما کی گرفتاری کا اعلان کیا ہے۔
المعلومہ ویب سائٹ کے مطابق عراق کے صوبہ الانبار کی آپریشن کمانڈ نے اعلان کیا کہ رمادی شہر کے شمال میں سکیورٹی آپریشن کے دوران داعش کے ایک خطرناک رہنما کو گرفتار کر لیا گیا،رپورٹ کے مطابق عراقی سکیورٹی فورسز نے رمادی کے شمال میں البوذیاب کے علاقے میں گھات لگا کر کارروائی کرتے ہوئے داعش کے اس رہنما کو بغیر کسی مزاحمت کے گرفتار کر لیا۔

ایک سکیورٹی ذریعے نے اس سلسلے میں کہا کہ گرفتار ہونے والا داعش کا رہنما صوبہ الانبار میں داعش کی باقیات کے اہم ترین عناصر میں شمار ہوتا ہے جو وسیع پیمانے پر عراقی سکیورٹی فورسز کے خلاف متعدد دہشت گردانہ کارروائیوں کا ذمہ دار تھا۔

عراقی سکیورٹی ذرائع نے داعش کے عناصر کے حراستی مقامات سے متعلق بعض انٹیلی جنس معلومات کا حوالہ دیتے ہوئے تاکید کی کہ ان معلومات کی بنیاد پر سکیورٹی فورسز نے کاروائی کی اور داعش کے اس خطرناک رہنما کو گرفتار کرنے میں کامیاب ہوئیں، انہوں نے مزید کہا کہ ماضی میں داعش کے اس رہنما کے خلاف متعدد عدالتی احکامات جاری کیے گئے ہیں۔

واضح رہے کہ حالیہ ہفتوں میں عراقی سکیورٹی فورسز نے اس ملک کے مغرب میں واقع شورش زدہ صوبوں میں بڑے پیمانے پر آپریشن شروع کیا ہے اور داعش دہشت گرد گروہ کے باقیات کی ایک بڑی تعداد کو ہلاک یا گرفتار کیا ہے۔