عراق میں ایک بار پھر داعشیوں کی شامت

?️ 15 ستمبر 2023

سچ خبریں: الحشد الشعبی فورسز کے ایک کمانڈر نے خانقین کے علاقے میں ان فورسز کے منفرد آپریشن کے دوران داعش کے درجنوں عناصر کی ہلاکت کا اعلان کیا۔

المعلومہ نیوز ایجنسی کی رپورٹ کے مطابق الحشد الشعبی فورسز کے کمانڈروں میں سے ایک بشیر العنبکی نے اعلان کیا کہ بعقوبہ سے 100 کلومیٹر شمال مشرق میں واقع خانقین کے بعض علاقوں میں داعش کے زیر زمین نیٹ ورکس کے خلاف ان فورسز کا آپریشن کامیاب رہا۔

یہ بھی پڑھیں:الحشد الشعبی امریکہ کی مشکوک نقل و حرکت پر کڑی نظر

انہوں نے مزید کہا کہ ہماری فورسز نے اس علاقے میں داعش کے عناصر کی نقل و حرکت کے بارے میں اطلاع ملنے کے بعد، انسداد دہشت گردی کی کاروائیوں کے نفاذ کے لیے ایک خصوصی اسٹریٹجک پلان تشکیل دیا جس کے بعد ہم نے درجنوں دہشت گرد عناصر کی ہلاکت کا مشاہدہ کیا۔

العنبکی نے کہا کہ خانقین اور اس کے آس پاس کے دیہاتوں میں اس سال الحشد الشعبی فورسز جو عراق کی سلامتی کی حمایت میں اہم کردار ادا کرتی ہیں، کی کوششوں کی وجہ سے کوئی دہشت گردانہ کارروائی دیکھنے کو نہیں ملی ۔

انہوں نے مزید کہا کہ الحشد الشعبی فورسز نے مختلف ممالک سے خانقین کے راستے عراق آنے والے نصف ملین سے زائد زائرین کی جانوں کی حفاظت اور انہیں اربعین مارچ کے بعد ان کے گھروں کو واپس کرنے میں بھی کامیابی حاصل کی ہے۔

واضح رہے کہ اس وقت الحشد الشعبی فورسز کے چھ بریگیڈ دیالہ کے 13 اضلاع میں تعینات ہیں۔

مزید پڑھیں: ہتھیار کے بدلے الحشد الشعبی منحل کرنے کا مطالبہ،وجہ؟

عراق کی الحشد الشعبی فورسز نے اس سے قبل صوبہ دیالہ میں اپنی افواج کی تعداد میں اضافے اور اس صوبے کی 3 جھیلوں میں ان فورسز کی موجودگی کا اعلان کیا تھا۔

اس سلسلے میں عراقی الحشد الشعبی کے کمانڈروں میں سے ایک محمد التمیمی نے المعلومہ کے ساتھ گفتگو میں اعلان کیا کہ دیالہ محور کی کمان دیالہ صوبے کے سکیورٹی پلان میں اہم اہداف حاصل کرنے کے لیے الحشد الشعبی کی آبی افواج پر خصوصی توجہ دیتی ہے۔