عالمی برادری اسرائیل کو غزہ میں جرائم پر جوابدہ ٹھہرائے:پاکستان

 عالمی برادری اسرائیل کو غزہ میں جرائم پر جوابدہ ٹھہرائے:پاکستان کا مطالبہ

پاکستان نے اسرائیلی وزیرِاعظم کے حالیہ بیان، جس میں فلسطینیوں کی جبری بے دخلی کی بات کی گئی تھی، کو سختی سے مسترد کرتے ہوئے عالمی برادری سے مطالبہ کیا ہے کہ اسرائیل کو اس کے جرائم پر جوابدہ بنایا جائے۔

دفترِ خارجہ پاکستان کی جانب سے جاری بیان میں کہا گیا ہے کہ فلسطینیوں کو جبری طور پر ان کی زمینوں سے نکالنے کے منصوبے بین الاقوامی قوانین کی کھلی خلاف ورزی ہیں اور یہ اقدام خطے میں امن اور استحکام کی کوششوں کو سبوتاژ کرنے کی دانستہ سازش ہے۔

بیان میں مزید کہا گیا کہ فلسطینیوں کی اجباری آوارگی اور غیرقانونی یہودی بستیوں کی توسیع، اسرائیل کی جانب سے انسانی حقوق اور عالمی قوانین کی کھلم کھلا پامالی ہے۔ اسلام آباد نے زور دیا کہ دنیا فلسطینی عوام کی ابتر صورتحال پر فوری توجہ دے اور قابض اسرائیلی حکومت کو جواب دہ بنائے۔

پاکستان نے ایک بار پھر فلسطینی عوام کی جدوجہدِ آزادی کی غیر متزلزل حمایت کرتے ہوئے کہا کہ اسلام آباد ایک آزاد، خودمختار فلسطینی ریاست کے قیام کے حق میں ہے جو 1967 کی سرحدوں پر مبنی ہو اور جس کا دارالحکومت بیت المقدس ہو۔

خیال رہے کہ اس سے قبل اسرائیلی وزیرِاعظم نے دعویٰ کیا تھا کہ غزہ کے نصف باشندے اس علاقے سے نکلنے کے خواہش مند ہیں اور اس اقدام کو جبری اخراج نہیں کہا جا سکتا۔ اس نے مصر پر الزام لگایا کہ وہ رفح بارڈر کراسنگ بند کرکے غزہ کے عوام کو باہر جانے کے حق سے محروم کر رہا ہے۔