صیہونی فوجیوں کے ہاتھوں فلسطینی نوجوان شہید

?️ 9 مارچ 2023

سچ خبریں:فلسطینی وزارت صحت نے اعلان کیا ہے کہ جنین کیمپ پر صیہونی فوج کے بڑے پیمانے پر حملے کے دوران زخمی ہونے والا فلسطینی نوجوان زخموں کی تاب نہ لاتے ہوئے شہید ہوگیا ہے۔

شہاب ویب سائٹ کے مطابق فلسطینی وزارت صحت نے اعلان کیا کہ دو روز قبل جنین کیمپ میں صہیونی فوجیوں کی گولی سے زخمی ہونے والا ولید سعد داؤد نصار نامی 14 سالہ فلسطینی نوجوان زخموں کی تاب نہ لاتے ہوئے شہید ہوگیا ہے۔

واضح رہے کہ فلسطینی وزارت صحت نے اپنی ایک رپورٹ میں کہا ہے کہ رواں سال کے آغاز سے اب تک فلسطینی شہداء کی تعداد 74 ہوگئی ہے جن میں 13 بچے اور ایک خاتون شامل ہیں۔

فلسطینی وزارت صحت کے اعدادوشمار کے مطابق جنین کے صوبوں میں 27 ، نابلس میں 18 ، الخلیل میں 7 ، مقبوضہ القدس کے 6 ، اریحا اور اغوار میں 5 ، قلقیلیہ کے 3 ، راملہ اور البیرہ کے 2 ،غزہ کے 2 ، بیت لحم 2 ، سلفیت کا 1 اور طوباس کا1 شہید شامل ہیں۔

دوسری جانب فلسطینی انسانی حقوق کے مرکز نے خواتین کے عالمی دن کے موقع پر ایک رپورٹ میں اعلان کیا ہے کہ اس سال کے آغاز سے اب تک صہیونی فورسز کے ہاتھوں 59 فلسطینی خواتین کو گرفتار کیا گیا نیز مرکزاطلاعات فلسطین کے مطابق گزشتہ سال (2022) میں 9 فلسطینی خواتین کو اسرائیلی فوجیوں نے شہید کیا۔

واضح رہے کہ مغربی کنارے کے مختلف علاقوں میں صیہونی حکومت کے جرائم کے جواب میں حالیہ مہینوں میں صیہونی مخالف کاروائیوں میں تیزی سے اضافہ ہوا ہے،اس طرح کہ اس حکومت کے سیاسی رہنما ، فوجی اور سیکورٹی ادارے ان کاروائیوں کا مقابلہ کرنے میں اپنی نااہلی کا اعتراف کرتے ہیں اور اس کی توسیع کے بارے میں خبردار کرتے ہیں۔