صیہونی حکومت کے شام کے شہروں قنیطرہ اور درعا پر حملے

سچ خبریں:  شام کی سرکاری خبررساں ایجنسی نے رپورٹ دی ہے کہ صیہونی فوج کے دستے، جن میں 8 فوجی گاڑیاں اور ایک ٹینک شامل تھے، تل ابو الغیثار سے قنیطرہ اور درعا کے انتظامی سرحدی علاقے وادی الرقاد کی طرف بڑھے اور پھر جنوبی شام کے شہر درعا کے مغربی مضافات میں واقع قصبہ جمعہ میں داخل ہو کر اس کے مختلف محلوں میں تعینات ہو گئے۔

خبر رساں ایجنسی کے مطابق، صیہونی فوجیوں کی جانب سے چھاپوں اور گھروں کی تلاشی کی کارروائیوں کے دوران ڈرون طیارے علاقے میں مسلسل پرواز کرتے رہے۔

اس سے قبل، صیہونی فوج کا ایک اور گشتی دستہ، جس میں 7 گاڑیاں تھیں، درعا کے مغربی مضافات میں واقع گاؤں معریہ میں داخل ہوا، جہاں اس نے متعدد مکانات کی تلاشی لی، راہگیروں کو روک کر ان سے پوچھ گچھ کی۔

مزید برآں، صیہونی حکومت کے فوجیوں کا ایک اور گروہ، جس میں 4 فوجی گاڑیاں تھیں، قنیطرہ کے جنوبی مضافات میں واقع گاؤں عین زیوان میں گھس گیا اور ایک مکان پر چھاپہ مار کر اس کے ایک مکین کو کئی گھنٹے تک حراست میں رکھا۔

یہ پیش رفت اس وقت ہوئی ہے جب صیہونی حکومت شامی سرزمین کے اندر اپنی جارحانہ کارروائیاں جاری رکھے ہوئے ہے، جو گزشتہ مہینوں میں شدت اختیار کر گئی ہیں۔ ان کارروائیوں میں عام شہریوں کے گھروں پر چھاپے، تلاشیاں، رکاوٹیں کھڑی کرنا اور کسانوں اور بچوں سمیت شہریوں کی گرفتاریاں شامل ہیں۔

8 دسمبر 2024 کو شام میں بشار الاسد کی حکمرانی کے خاتمے کے بعد، تل ابیب نے نئی دہشت گرد حکومت کی خاموشی کا فائدہ اٹھاتے ہوئے، نہ صرف مختلف علاقوں میں شامی فوج کے بھاری سازوسامان کو میزائلوں سے نشانہ بنایا، بلکہ شامی سرزمین کے متعدد اسٹریٹجک حصوں پر بھی قبضہ کر لیا۔