صیہونی جوہری ہتھیار

🗓️ 2 اگست 2022

سچ خبریں:صیہونی عبوری حکومت کے وزیراعظم نے غیر واضح طور پر اس حکومت کے ایٹمی ہتھیاروں کا ذکر کیا۔
صیہونی حکومت کے وزیر اعظم نے پیر کے روز اس حکومت کے ایٹمی توانائی کمیشن کے نئے سربراہ کی تقرری کی تقریب میں ایک بار پھر غیر واضح طور پر اس بات کی تصدیق کی کہ اس حکومت کے پاس ایٹمی ہتھیار موجود ہیں،ٹائمز آف اسرائیل کے مطابق اسرائیلی وزیر اعظم یائر لاپڈ نے جوہری ہتھیاروں کے ذخیرے کی پردہ پوشی کرتے ہوئے اشارہ کیا کہ تل ابیب کے پاس تمام خطرات کے خلاف اپنی بقا کو یقینی بنانے کے لیے دوسری صلاحیتیں موجود ہیں۔

لاپڈ نے کہا کہ اسرائیل کی آپریشنل صلاحیتوں میں دفاعی صلاحیتوں اور جارحانہ صلاحیتوں کے ساتھ ساتھ اور بھی بہت کچھ ہے جسے غیر ملکی میڈیا دیگر صلاحیتوں کا نام دیتا ہے۔

لاپڈ نے مزید کہا کہ یہ دیگر صلاحیتیں ہیں جو ہمیں زندہ رکھتی ہیں اور ہماری بقا کو یقینی بناتی ہیں جب تک کہ ہمارے بچے یہاں موجود ہیں،اپنی تقریر کے ایک اور حصے میں صیہونی حکومت کے وزیر اعظم نے ایران کے ایٹمی پروگرام کا ذکر کرتے ہوئے کہا کہ ایرانی ترقی کر رہے ہیں۔

یاد رہے کہ ابھی تک صیہونی حکومت نے سرکاری طور پر اس بات کی تصدیق نہیں کی ہے کہ اس کے پاس جوہری ہتھیار ہیں،دریں اثنا ایران جوہری عدم پھیلاؤ کے معاہدے(NPT) کے دستخط کنندگان میں سے ایک اور بین الاقوامی جوہری توانائی ایجنسی کے رکن کے طور پر اس بات پر زور دیتا ہے کہ اسے پرامن جوہری ٹیکنالوجی کا حق حاصل ہے۔