صیہونیوں کی جنگ بندی کی خلاف ورزی

🗓️ 29 اگست 2022

سچ خبریں:صیہونی حکومت کی جانب سے غزہ کی پٹی کے ساتھ جنگ بندی کے دوران شیخ بسام السعدی کی رہائی کے وعدے کے باوجود یہ حکومت شیخ بسام السعدی اور خلیل العوادہ سمیت فلسطینی قیدیوں کی رہائی کے حوالے سے اپنی ذمہ داریوں کو پورا کرنے سے انکاری ہے۔

اسرائیلی عدالت نے مغربی کنارے میں جہاد اسلامی تحریک کے رہنماؤں میں سے ایک شیخ بسام السعدی کی نظربندی میں اس ہفتے کے بدھ تک توسیع کر دی، یاد رہے کہ صیہونی حکومت نے ایک ماہ قبل شیخ بسام السعدی کو متعدد دیگر افراد کے ہمراہ مغربی کنارے میں ان کے گھر پر چھاپہ مار کر گرفتار کیا تھا۔

یہ گرفتاری جہاد اسلامی تحریک اور صیہونی فوج کے درمیان تین روزہ جنگ کی باعث بنی جس کے بعد اور شیخ بسام السعدی اور ایک اور فلسطینی قیدی خلیل العوادہ کی رہائی کے لیے صیہونی حکومت کے وعدے کے ساتھ جنگ بندی ہوئی۔

واضح رہے کہ مذکورہ معاہدے کے باوجود تل ابیب نے اپنی ذمہ داریوں کی خلاف ورزی کرتے ہوئے ان دونوں فلسطینی قیدیوں کو رہا کرنے سے انکار کر دیا ہے، یہ اس حقیقت کے باوجود ہے کہ شیخ بسام کے علاوہ ایک اور فلسطینی قیدی خلیل العوادہ کی بھوک ہڑتال کے 168 دنوں میں حالت تشویشناک قرار دی گئی ہے۔