شمالی شام پر ترکی سے وابستہ ملیشیا کے راکٹ حملے

🗓️ 21 جون 2021

سچ خبریں:شمالی شام کے شہر حلب کے نواح کے مقبوضہ علاقوں میں ترکی کے حمایت یافتہ عسکریت پسندوں نے تل رفعت اور عین دقنہ گاؤں کے آس پاس رہائشی مکانات کو نشانہ بنایا۔
المسیرہ نیوز ایجنسی کی رپورٹ کے مطابق ترک فوج اور ان سے وابستہ افراد نے شمالی شام کے شہر حلب کے نواحی علاقوں میں شہریوں کے گھروں پر حملہ کیا، رپورٹ کے مطابق شام کے مقامی ذرائع نے بتایا کہ ترک فوج اور اس سے وابستہ ملیشیا نے حلب کے شمالی مضافاتی علاقے کے مقبوضہ علاقوں سے حملے کیے اور انقرہ سے وابستہ ملیشیا نے رفعت کے نواحی علاقوں پر متعدد راکٹ فائر کیے۔

ذرائع نے مزید کہاکہ ترکی سے وابستہ ملیشیا نے حلب کے نواح میں اپنے مقبوضہ علاقوں میں تل رفعت قصبے اور حلب کے شمالی نواحی علاقے میں واقع عین دقنہ گاؤں کے آس پاس رہائشی مکانات کو نشانہ بنایا جس سے مکانات کو نقصان پہنچا اور کچھ عمارتیں تباہ ہوگئیں،یادرہے کہ گذشتہ روز ترک افواج اور ان سے وابستہ گروہوں نے شمالی شام کے گاؤں مرعناز اور تل رفعت نامی گاؤں پر حملہ کیا۔

واضح رہے کہ امریکہ کی طرح ترکی نے شام کے کچھ علاقوں پر غیر قانونی قبضہ جمایا ہوا ہے جہاں وہ آئے دن اپنے من مانے قوانین نافذ کرتے ہیں جبکہ ان علاقوں کے شہری متعدد بار یہاں موجود ترک فوج کے خلاف مظاہرے کر چکے ہیں اور ان سے ان علاقوں سے چلے جانے کا مطالبہ کر چکے ہیں تاہم ترکی پر کوئی اثر نہیں ہوا ہے اوروہ شام سے نہ صرف یہ کہ نکلنے کے بارے میں سنجیدہ نہیں ہے بلکہ یہاں اپنی موجودگی کو مزید کر رہا ہے۔