سوڈان میں تنازعات سے کیا حاصل ہوا ہے؟ اقوام متحدہ کی رپورٹ

🗓️ 13 اپریل 2024

سچ خبریں: سوڈان میں اقوام متحدہ کے فیکٹ فائنڈنگ مشن نے اعلان کیا کہ اس اس ملک میں ہونے والے تنازعات کے نتیجے میں ہزاروں سوڈانی ہلاک ہو چکے ہیں۔

اسپوٹنک نیوز ایجنسی کی رپورٹ کے مطابق سوڈان میں اقوام متحدہ کے فیکٹ فائنڈنگ مشن نے اس ملک میں تقریباً ایک سال سے جاری جنگ اور تنازع کے نتیجے ہزاروں شہریوں کی ہلاکت اور لاکھوں سوڈانی باشندوں کے بے گھر ہونے کا اعلان کیا ہے۔

اس حوالے سے اقوام متحدہ کے سکریٹری جنرل کے ترجمان اسٹیفن ڈوجارک نے کہا کہ سوڈان کے اندر 60 لاکھ سے زیادہ لوگ بے گھر ہوچکے ہیں اور تقریباً 20 لاکھ دیگر پڑوسی ممالک میں بھاگ گئے ہیں،اس کے علاوہ اس ملک میں تقریباً 24 ملین لوگوں کو مدد کی ضرورت ہے۔

یہ بھی پڑھیں: سوڈان میں ختم نہ ہونے والی خانہ جنگی

ڈوجارک نے یہ بھی بتایا کہ اگلے پیر کو پیرس سوڈان اور اس کے پڑوسیوں کے بارے میں ایک کانفرنس کی میزبانی کرے گا اور فرانس، جرمنی اور یورپی یونین اس کانفرنس میں شرکت کریں گے۔

انہوں نے مزید کہا کہ اقوام متحدہ کے اسسٹنٹ سکریٹری جنرل برائے انسانی امور، جوائس میسویا، اقوام متحدہ کے بعض دیگر حکام کے ساتھ اس کانفرنس میں شرکت کریں گے اور سوڈان اور علاقے میں امدادی کارروائیوں کو وسعت دینے کے لیے وسائل میں اضافے کی درخواست کریں گے۔

انہوں نے مزید کہا کہ وہ انسانی امداد کی فراہمی کو بھی بہتر بنانا چاہیں گے تاکہ ایجنسیاں ضرورت مند کمیونٹیوں کو زندگی بچانے والی امداد صحیح وقت پر پہنچا سکیں نیز اس کانفرنس میں اقوام متحدہ کے سکریٹری جنرل ایک ویڈیو پیغام بھی بھیجیں گے۔

مزید پڑھیں: سوڈان کی خانہ جنگی میں سب سے زیادہ نقصان کسے ہو رہا ہے؟

واضح رہے کہ 15 اپریل کو جنرل عبدالفتاح البرہان کی کمان میں سوڈانی فوج اور جنرل حمیدتی کی کمان میں اس ملک کی ریپڈ اسپورٹ فورسز کے درمیان لڑائی کو ایک سال ہو جائے گا۔