سعودی عرب کی صیہونیوں کے ساتھ تعلقات کی بحالی کی شرط

🗓️ 9 اگست 2023

سچ خبریں: صیہونی فوج کے ایک اعلیٰ فوجی عہدیدار نے مسئلہ فلسطین کے حل کے بغیر اس حکومت کے ساتھ تعلقات کو معمول پر لانے کے لیے سعودی عرب کے اقدام کے بارے میں قیاس آرائیوں کو خام خیالی قرار دیا۔

اسپوٹنک نیوز ایجنسی کی رپورٹ کے مطابق حالیہ عرصے میں صیہونی حکومت اور سعودی عرب کے درمیان تعلقات کو معمول پر لانے کے حوالے سے صیہونیوں کے تبصروں میں اضافہ ہوا ہے لیکن دوسری جانب ریاض نے اس حوالے سے خاموشی اختیار کر رکھی ہے۔

یہ بھی پڑھیں: کیا صہیونی سعودی عرب کے ساتھ تعلقات معمول پر لا پائیں گے

اس سلسلے میں عبرانی زبان کے اخبار Yediot Aharonot نے رپورٹ دی ہے کہ مغربی کنارے میں صیہونی حکومت کی کاروائیوں کے سابق کوآرڈینیٹر جنرل ایتھن ڈانگوٹے نے ایک بیان میں اعتراف کیا ہے کہ جو کوئی یہ سمجھتا ہے کہ سعودی عرب مسئلہ فلسطین کے حل ہوئے بغیر اسرائیل کے ساتھ اپنے تعلقات کو معمول پر لائے گا، وہ دھوکے میں ہے۔

ادھر سعودی عرب نے بارہا اس بات پر تاکید کی ہے کہ جب تک مسئلہ فلسطین حل نہیں ہو جاتا اور مشرقی بیت المقدس کو دارالحکومت قرار دیتے ہوئے فلسطینی ریاست قائم نہیں ہو جاتی اس وقت تک اس ملک اور صیہونی حکومت کے درمیان تعلقات کے معمول پر آنے کی کوئی خبر نہیں ۔

مزید پڑھیں: صیہونیوں کا سعودی عرب کے ساتھ دوستی کا خواب کیوں پورا نہیں ہوگا؟

ڈانگوٹے نے غزہ میں مقیم فلسطینی نژاد امریکیوں کو تل ابیب کے بن گورین ہوائی اڈے کے ذریعے مقبوضہ علاقوں میں داخلے اور باہر نکلنے کے اجازت نامے دینے پر تنقید کرتے ہوئے کہا کہ یہ اقدام غزہ کی پٹی میں مزاحمت کے ہاتھوں ہلاک ہونے والے دو صہیونی فوجیوں کی لاشوں کی واپسی سے مشروط ہونا چاہیے تھا۔

واضح رہے کہ صیہونی حکومت نے اس حکومت اور امریکہ کے درمیان جاری مذاکرات کے فریم ورک میں پیر کے روز اعلان کیا کہ فلسطینی نژاد امریکی شہری جو غزہ کے رہائشی ہیں، تل ابیب کے بین گورین ہوائی اڈے سے بغیر ویزا کے آ جا سکتے ہیں۔