سعودی عرب خون کی ندیاں؛ایک دن میں81 افراد کے سر قلم

?️ 14 مارچ 2022

سچ خبریں:سعودی عرب کی حکومت نے اس ملک کی تاریخ میں پہلی بار ایک دن میں81 افراد کا سر قلم کر دیا جن پرسیکیورٹی اہلکاروں کے قتل، بارودی سرنگیں بچھانے، اغوا، تشدد، عصمت دری اور مسلح ڈکیتی جیسے جرائم میں ملوث ہونے کے الزامات تھے۔
سعودی سرکاری میڈیا کی رپورٹ کے مطابق عبادت گاہوں اور سرکاری اداروں کو نشانہ بنانے، سکیورٹی اہلکاروں کے قتل، بارودی سرنگیں بچھانے، اغوا، تشدد، عصمت دری اور مسلح ڈکیتی جیسے جرائم میں ملوث ہونے کے الزام میں 81 افراد کا سر قلم کردیا گیا۔

سعودی حکام کا کہنا ہے سر قلم کیے جانے والوں میں القاعدہ اور داعش سے تعلق رکھنے والے سعودی اور غیر ملکی شہری شامل ہیں جن میں اکثریت یمن کے شہریوں کی ہے جن پر ایران کے حمایت یافتہ حوثی باغیوں کے منصوبوں میں معاونت اور ہتھیاروں کی فراہمی کا الزام تھا۔
سعودی وزارت نے کہا کہ ان مجرموں کو متعلقہ عدالت میں مقدمات کی سماعت کے بعد سزا سنائی گئی، انہوں نے مزید کہا کہ سزائے موت کے فیصلوں پر اپیل کورٹ اور سپریم کورٹ سے منظوری کے بعد عمل درآمد کے لیے شاہی حکم جاری کیا گیا تھا۔

خیال رہے کہ ایک ہی دن میں 81 افراد کی سزائے موت پر عمل درآمد کا یہ پہلا واقعہ ہے، گزشتہ برس اتنے ہی افراد کو پورے سال میں سزائے موت دی گئی تھی۔