روسی گیس کی سپلائی منقطع ہونے سے یورپ کے گھٹنے ٹیکنے کا امکان

?️ 9 ستمبر 2022

سچ خبریں:ہنگری کے وزیر اعظم اور وزیر خارجہ نے روس کی جانب گیس سپلائی کو فوری طور پر بند کرنے اور یورپ کے گھٹنے ٹیکنے پر مجبور ہونے کے بارے میں خبردار کیا۔

اسپوٹنک نیوز ایجنسی کی رپورٹ کے مطابق ہنگری کے وزیر اعظم وکٹر اوربان نے خبردار کیا کہ روس کے خلاف پابندیوں کی وجہ سے مہنگائی کی بلند سطح اور توانائی کی قلت یورپ کو گھٹنے ٹیکنے پر مجبور کر سکتی ہے، ہنگری کے وزیر اعظم نے اس بات پر بھی زور دیا کہ روس کے خلاف وسیع پابندیوں کے باوجود یوکرین میں جنگ تھمی نہیں اور روس کو کمزور کرنے کی کوششیں ناکام ہو چکی ہیں۔

اوربان نے کہا کہ یورپ کو اپنی پابندیوں کی پالیسی کو تبدیل کرنا چاہیے کیونکہ بصورت دیگر حالات خود اس براعظم کے لیے مزید مشکل ہو جائیں گے، ہنگری کے وزیر اعظم کے یہ بیانات ایک ایسے وقت میں سامنے آئے ہیں جب اس ملک کے وزیر خارجہ نے بھی کہا کہ روسی گیس کی قیمت کی حد مقرر کرنے سے یورپ کو اس کی سپلائی میں فوری طور پر رکاوٹ پیدا ہو سکتی ہے۔

واضح رہے کہ اس سے قبل ہنگری کے وزیر اعظم نے یورپی رہنماؤں سے خطاب میں اعلان کیا تھا کہ یہ ملک روسی توانائی کے شعبے پر یورپی یونین کی کسی بھی پابندی کے خلاف ہے، ہنگری جو یورپی یونین کا رکن ہے، یوکرین میں روس کی فوجی کارروائی کے بعد سے ماسکو کے ساتھ اپنے تعلقات برقرار رکھے ہوئے ہے اور اس موقف کی وجہ سے اس کے یورپی اتحادیوں کے ساتھ تناؤ پیدا ہوا ہے جو روس کے خلاف سخت رویہ اختیار کرنا چاہتے ہیں۔