روسی فوج کی یوکرائن کی طرف پیش قدمی کا مضحکہ خیز الزام

?️ 16 فروری 2022

سچ خبریں:روس کے اعلیٰ سفارت کاروں نے امریکی میڈیا کے اس دعوے کو مضحکہ خیز اور حیران کن قرار دیا کہ روس 16 فروری کو یوکرئن پر حملہ کرنے کا منصوبہ بنا رہا ہے اور روسی فوجی یوکرائن کی سرزمین کی طرف پیش قدمی کر رہے ہیں۔
مغربی سیاست دان اور میڈیا یوکرائن پر ممکنہ روسی حملے کے بارے میں بے بنیاد قیاس آرائیاں کرتے رہتے ہیں، تاہم روسی فریق نے بارہا ایسے الزامات کی تردید کی ہے اور اس بات پر زور دیا ہے کہ اس کا اپنے پڑوسی ملک پر حملہ کرنے کا کوئی منصوبہ نہیں ہے اورہماری تمام تر فوجی نقل و حرکت کا واحد مقصد روس کے اندر فوجیوں کو تربیت دینا ہے۔

واضح رہے کہ بعض مغربی ذرائع ابلاغ نے تو یوکرائن پرروس کے حملے کی تاریخ بھی طے کر دی ہے، پولیٹیکو نے 16 فروری جبکہ بلومبرگ نے حملے کی تاریخ کو 15 فروری بتایا ہے۔

درایں اثناروسی وزارت خارجہ نے اس بات پر زور دیا ہے کہ مغربی میڈیا معاہدوں کی بنیاد پر تنازع کے سفارتی حل کے لیے ماسکو کے عزم کو نظر انداز کرتا ہے اور ساتھ ہی روس کی سرحدوں سے نیٹو کے فوجی ڈھانچے کے قریب ہونے کی وجہ سے اس کی سلامتی کے بارے میں خدشات کو بھی نظرانداز کرتا ہے۔