حماس کا سیاسی مرکز دوحہ کے بعد کہاں ہوگا؟

حماس کا سیاسی مرکز دوحہ کے بعد کہاں ہوگا؟

عرب روزنامہ رای الیوم نے اپنی تازہ رپورٹ میں اسرائیل کی جانب سے قطر میں حماس کی قیادت کو نشانہ بنانے کی ناکام کوشش کے بعد ممکنہ نتائج اور اس تحریک کے سیاسی دفتر کی آئندہ منتقلی کے بارے میں تجزیہ کیا ہے۔

رپورٹ کے مطابق، تل ابیب قطر پر دباؤ ڈال رہا ہے کہ وہ حماس رہنماؤں کو دوحہ سے نکالے، اور یہاں تک دھمکی دی گئی ہے کہ اگر ایسا نہ ہوا تو حملے دوبارہ دہرائے جائیں گے۔ اس صورتحال میں مختلف ممالک بطور میزبان زیر غور ہیں۔

الجزائر: فلسطین کی کھل کر حمایت اور اسرائیل کے ساتھ تعلقات نارملائز نہ کرنے کی وجہ سے حماس کے لیے موزوں ترین آپشن سمجھا جا رہا ہے۔ صدر عبدالمجید تبون بھی اسی پالیسی کو مضبوط کرنا چاہتے ہیں۔

مصر: ثالثی کردار کی بدولت یہ امکان موجود ہے کہ قاہرہ حماس رہنماؤں کی میزبانی کرے۔ مصری حکام نے امریکہ کو وارننگ دی ہے کہ اسرائیل کی جانب سے مصر میں کسی کارروائی کی صورت میں نتائج تباہ کن ہوں گے۔

قطر نے اسرائیلی حملے کے باوجود امریکہ کے ساتھ اپنے تعلقات میں کسی قسم کی نظرثانی کی خبروں کو سختی سے مسترد کیا ہے اور کہا ہے کہ واشنگٹن کے ساتھ سیکورٹی اور دفاعی روابطماضی سے زیادہ مستحکم ہیں۔

قطر آئندہ ہفتے عرب و اسلامی ممالک کا ہنگامی اجلاس بھی بلانے جا رہا ہے تاکہ اسرائیلی حملے کے اثرات پر بات کی جا سکے۔

خلیجی ممالک میں حماس اور اسرائیل کے معاملے پر مختلف رویے دیکھنے میں آ رہے ہیں۔ امارات کے صدر محمد بن زاید قطر گئے اور اظہار یکجہتی کیا، لیکن سعودی ولی عہد محمد بن سلمان باوجود وعدے کے دوحہ نہ گئے۔

اسرائیلی اخبار معاریو کے سروے کے مطابق 75 فیصد اسرائیلی قطر میں حماس رہنماؤں پر حملے کے حامی ہیں، تاہم تقریباً نصف نے اس کارروائی کے وقت پر سوال اٹھایا۔

رای الیوم کا کہنا ہے کہ اسرائیل کے بڑھتے ہوئے عزائم اور گتریٹر اسرائیل کے خواب نے یہ ثابت کر دیا ہے کہ مزاحمتی محاذ، ایران اور ان کے اتحادی اس جدوجہد میں تنہا نہیں۔ یہاں تک کہ وہ عرب ممالک جو پہلے مزاحمت کو خطے کی بدامنی کا ذمہ دار ٹھہراتے تھے، اب خود اسرائیلی اقدامات کو اپنی سلامتی کے لیے خطرہ محسوس کر رہے ہیں۔