حزب اللہ کا صیہونی حکومت کو نیا انتباہ

?️ 29 اگست 2022

سچ خبریں:   لبنانی استقامتی تنظیم نے ایک نئی ویڈیو شائع کی ہے جس میں دکھایا گیا ہے کہ غاصب صیہونی حکومت کے گیس نکالنے والے جہاز لبنان اور مقبوضہ فلسطین کی سرحد پر مکمل نگرانی میں ہیں۔

اس رپورٹ کے مطابق انتم رہن الایام آپ کے پاس صرف چند دن باقی ہیں کے عنوان سے اس ویڈیو میں صیہونی حکومت کو خبردار کیا گیا ہے کہ مذکورہ بحری جہاز لبنان کے استقامتی میزائلوں کی زد میں ہیں۔

پچھلے انتباہ میں 12 اگست کو حزب اللہ نے لبنان اور صیہونی حکومت کے درمیان متنازعہ گیس فیلڈ پر تین غیر مسلح ڈرونز کی پرواز کے بارے میں ایک بیان میں اعلان کیا تھا۔

اگرچہ اسرائیلی فوج نے اعلان کیا کہ اس نے تینوں ڈرونز کو روک کر انہیں نشانہ بنایا ہے لیکن حزب اللہ نے اپنے بیان میں اس بات پر زور دیا تھا کہ ان ڈرونز کا ایک انٹیلی جنس مشن تھا اور وہ اپنے مشن کو کامیابی سے انجام دینے اور حزب اللہ کی جانب سے انتباہی پیغام پہنچانے میں کامیاب رہے تھے۔

حزب اللہ کے سکریٹری جنرل سید حسن نصر اللہ نے 28 اگست کو ایک تقریر میں کہا کہ اگر امریکی ثالث آکر لبنانی حکومت کے مطالبات کو پورا کردے تو ہم بھی امن کی طرف بڑھیں گے لیکن اگر اس نے حکومت کے مطالبات پر عمل نہیں کیا تو ہم بھی صیہونی حکومت کی طرف بڑھیں گے۔

لبنان اور صیہونی حکومت کے درمیان متنازع سمندری علاقہ 860 مربع کلومیٹر ہے اور تیل اور گیس سے مالا مال ہے۔ اس وقت دونوں کے درمیان بالواسطہ مذاکرات امریکہ کے خصوصی ایلچی آموس ہوچسٹین کی ثالثی اور اقوام متحدہ کی نگرانی میں ہو رہے ہیں۔