جیل میں عمران خان کی حالت تشویشناک ہے:امریکی سفارتکار

جیل میں عمران خان کی حالت تشویشناک ہے:امریکی سفارتکار

امریکہ کے سابق نمائندۂ خصوصی برائے افغانستان، زلمی خلیل‌زاد نے سابق وزیراعظم پاکستان عمران خان کی صحت کے حوالے سے سنگین خدشات ظاہر کیے ہیں۔

خلیل‌زاد نے سوشل میڈیا پلیٹ فارم ایکس پر لکھا کہ عمران خان جیل میں انتہائی مشکل حالات کا سامنا کر رہے ہیں اور ان کی جسمانی حالت دن بدن خراب ہو رہی ہے۔ ان کے مطابق، خان کو دی جانے والی خوراک میں انسولین ملائے جانے کا شبہ ہے، جو ان کے لیے دل کا دورہ پڑنے کا خطرہ بڑھا سکتا ہے، جبکہ فراہم کیا جانے والا پانی بھی آلودہ بتایا جا رہا ہے۔

امریکی سفارتکار نے اس صورتحال کو ایک سیاسی قیدی کے ساتھ شرمناک سلوک قرار دیا اور کہا کہ یہ طرزِ عمل فوری طور پر ختم ہونا چاہیے۔ ان کا کہنا تھا کہ اس معاملے کو اقوام متحدہ کے خصوصی نمائندہ برائے انسدادِ تشدد کے سامنے اٹھایا جانا چاہیے، اور عالمی سیاسی رہنماؤں کو عمران خان کی حمایت کے لیے آگے آنا چاہیے۔

خیال رہے کہ عمران خان گزشتہ سال سے جیل میں قید ہیں اور ان پر عدالتوں نے متعدد مقدمات میں سزائیں سنائی ہیں۔ تاہم، ان کا مؤقف اور ان کی جماعت تحریک انصاف کا کہنا ہے کہ یہ تمام مقدمات سیاسی انتقام کا حصہ ہیں۔ ان کی گرفتاری کے بعد پاکستان میں کئی بار شدید سیاسی کشیدگی اور عوامی مظاہرے دیکھنے میں آئے ہیں