جنوبی شام میں داعش کا ایک رہنما ہلاک

?️ 16 اگست 2022

سچ خبریں:داعش تکفیری گروہ کی فوجی کارروائیوں کا انچارج ابو عمر جبابی کے نام سے مشہور محمود احمد الحلاق دہشتگرد جنوبی شام میں مارا گیا۔
شام کی سرکاری خبر رساں ایجنسی سانا کی رپورٹ کے مطابق اس ملک کے سرحدی صوبے درعا کے شہر طفس میں شامی سکیورٹی فورسز کی گشت کے دوران انہیں جبابی کے ٹھکانے کا پتا چلا جس کے بعد اس کا تعاقب کر کے ہلاک کیا گیا۔

سانا کے مطابق جبابی ایک عرب ملک کی انٹیلی جنس ایجنسیوں کے ساتھ داعش گروپ کے رابطے کا ذمہ دار تھا نیز ابو سالم العراقی اور عبدالرحمن العراقی کے ساتھ مل کر صوبہ درعا میں داعش کے رہنماؤں میں سے ایک تھا، واضح رہے کہ ابو سالم العراقی گزشتہ بدھ کو شامی سکیورٹی فورسز کی اسی طرح کی کارروائی میں صوبہ درعا کے مغربی مضافات میں واقع عدوان شہر میں مارا گیا تھا۔

یاد رہے کہ حال ہی میں صوبہ درعا خاص طور پر شہر طفس کے عوام نے شامی فوج کے ساتھ مفاہمتی معاہدہ کیا جس کے مطابق باشندوں نے اپنے ہتھیار شامی فوج کے حوالے کیے جس کے بعد فوجی دستے سکیورٹی کو یقینی بنانے اور دہشت گردوں کے ٹھکانوں کی نشاندہی کرنے کے لیے گشت کررہے ہیں، معاہدے کے مطابق درعا صوبے کے مختلف شہروں میں داعش کے رہنماؤں کے ٹھکانوں کی نشاندہی کی گئی اور ان کا تعاقب کرنے کے بعد ہلاک کر دیا گیا۔