سچ خبریں:سعودی عرب کی ایک سماجی تنظیم نے انکشاف کیا ہے کہ ایک خاتون سماجی کارکن کو سعودی حکام نے 34 سال قید کی سزا سنائی ہے۔
عربی21 کی رپورٹ کے مطابق مبادرہ الحوریہ (فریڈم انیشیٹو) کے نام سے مشہور سماجی تنظیم جس کا صدر دفتر واشنگٹن میں ہے، نے انکشاف کیا کہ سعودی عرب کی ایک عدالت نے انسانی حقوق کی کارکن سلمی الشہاب کو 34 سال قید کی سزا سنائی ہے۔
اس تنظیم کی رپورٹ کے مطابق سلمی الشہاب کو گزشتہ سال سعودی عرب کے دورے کے دوران گرفتار کیا گیا تھا۔، اس تنظیم نے یہ بھی اعلان کیا کہ یہ سعودی خاتون کارکن لیڈز یونیورسٹی میں زیر تعلیم ہیں اور انگلینڈ کی رہائشی ہیں،واضح رہے کہ دوبیٹیوں کی ماں الشہاب نے آل سعود کے ہاتھوں گرفتار ہونے سے قبل فلسطین کے مسئلے اور سعودی عرب میں خواتین کے حقوق کی حمایت میں ٹویٹس شائع کی تھیں،انہوں نے سعودی عرب میں سیاسی قیدیوں کی رہائی کا بھی کئی بار مطالبہ کیا۔
مذکورہ تنظیم نے یہ بھی اطلاع دی ہے کہ سلمی مشرقی عرب میں رہنے والی ہیں اور ان کے خلاف جاری ہونے والی سزا سعودی عرب میں خواتین کے حقوق کے محافظوں کی فہرست میں سب سے طویل ہے، اس ادارے کی رپورٹ کے مطابق سلمی الشہاب کی ابتدائی سزا چھ سال قید تھی تاہم اپیل کورٹ نے اس سزا کو بڑھا کر 34 سال کر دیا۔