جاپان کی پہلی خاتون وزیراعظم معیشت اور سیاسی چیلنجز کا سامنا

جاپان کی پہلی خاتون وزیراعظم معیشت اور سیاسی چیلنجز کا سامنا

جاپان کی پارلیمان نے منگل کے روز سانائے تاکائیچی کو ملک کی تاریخ کی پہلی خاتون وزیرِاعظم منتخب کر لیا۔ تجزیہ کاروں کا کہنا ہے کہ وہ اپنے پیشرو فومیو کشیدا کے چھوڑے ہوئے داخلی بحرانوں اور سیاسی بے چینی کی وارث ہیں، اور ان کی کامیابی یا ناکامی جاپان کی حکمران جماعت لبرل ڈیموکریٹک پارٹی (LDP) کے مستقبل کا تعین کرے گی۔

بین الاقوامی مبصرین نے تاکائیچی کو "جاپان کی مارگریٹ تھیچر” قرار دیا ہے، مگر ان کے سامنے معیشت کی بگڑتی صورتحال، کم ہوتی آبادی، بڑھتی مہنگائی اور کمزور ہوتی کرنسی جیسے بڑے مسائل موجود ہیں۔

تاکائیچی نے وزارتِ عظمیٰ سنبھالتے ہی "سانائے اکنامکس” کے نام سے ایک نئی اقتصادی پالیسی متعارف کرائی ہے، جو ان کے سیاسی رہنما شینزو آبی کی "آبے اکنامکس” سے متاثر ہے۔ اس منصوبے میں بڑے پیمانے پر مالیاتی اخراجات شامل ہیں، مگر ماہرین خبردار کر رہے ہیں کہ یہ پالیسی ین کی قدر میں مزید کمی اور جاپان کے قرضوں میں اضافے کا باعث بن سکتی ہے۔

پروفیسر کیدرا (Meiji University) کے مطابق،حکومت کے بڑے مالیاتی اقدامات عوامی قرض کو خطرناک حد تک بڑھا سکتے ہیں، جب کہ عام جاپانی شہری پہلے ہی مہنگائی کی مار جھیل رہے ہیں۔

ایک اور اہم مسئلہ جاپان اور امریکہ کے درمیان 550 ارب ڈالر کے سرمایہ کاری معاہدے کا ہے، جسے سابق حکومت نے طے کیا تھا۔ اس منصوبے کے تحت جاپان کو امریکہ میں توانائی، سیمی کنڈکٹرز اور جہاز سازی کے شعبوں میں بھاری سرمایہ کاری کرنی ہے، جب کہ امریکی زرعی مصنوعات کی سالانہ خریداری بھی اس میں شامل ہے۔

سیاسی تجزیہ کار رینتارو نیشیمورا کا کہنا ہے کہ تاکائیچی ممکنہ طور پر اس معاہدے پر نظرِثانی کریں گی، کیونکہ "ڈونلڈ ٹرمپ کی غیر متوقع پالیسیوں” کے پیش نظر جاپان محتاط رویہ اختیار کرنا چاہتا ہے۔

تاکائیچی اپنے استاد شینزو آبی کی طرح جاپان کی فوجی صلاحیت بڑھانے کی حامی ہیں۔ وہ دفاعی بجٹ کو نمایاں حد تک بڑھانے کی خواہشمند ہیں تاکہ جاپان ناتو کے 5 فیصد معیار کے قریب پہنچ سکے — ایک اقدام جو ممکنہ طور پر ٹرمپ انتظامیہ کو خوش کرے گا۔

تاکائیچی کو ایک "چین مخالف” رہنما کے طور پر جانا جاتا ہے۔ ماضی میں انہوں نے دعویٰ کیا تھا کہ "جاپان میں موجود چینی شہری اپنے ملک کے لیے جاسوسی کرنے پر مجبور ہیں۔”

تاہم تجزیہ کاروں کا کہنا ہے کہ وزارتِ عظمیٰ کا عہدہ سنبھالنے کے بعد وہ اپنے لہجے کو نرم کرنے پر مجبور ہوں گی، کیونکہ چین جاپان کا سب سے بڑا تجارتی شراکت دار ہے۔

دلچسپ بات یہ ہے کہ جاپان کی پہلی خاتون وزیراعظم ہونے کے باوجود تاکائیچی خواتین کے کچھ بنیادی حقوق کی مخالف ہیں۔ وہ شادی کے بعد خواتین کو اپنا خاندانی نام برقرار رکھنے کی اجازت دینے اور شاہی خاندان میں خواتین کو جانشینی دینے کی بھی مخالف رہی ہیں۔

لبرل ڈیموکریٹک پارٹی پچھلے ایک سال سے مالی بدعنوانیوں اور عوامی ناپسندیدگی کے باعث بحران کا شکار ہے۔ صرف ایک سال میں دو وزرائے اعظم کے استعفے پارٹی کے لیے بڑا دھچکا تھے۔اب سوال یہ ہے کہ کیا سانائے تاکائیچی پارٹی کے لیے نئی زندگی کا باعث بنیں گی یا ان کی قیادت مزید سیاسی زوال کا آغاز ثابت ہوگی؟