بھارت میں نیا بحران،مزدور یونین نے لیبر قوانین کو نتقید کا نشانہ بنایا 

?️ 22 نومبر 2025

بھارت میں نیا بحران،مزدور یونین نے لیبر قوانین کو نتقید کا نشانہ بنایا

بھارت میں مزدور تنظیموں نے حکومت کے نافذ کردہ نئے لیبر قوانین کو سخت تنقید کا نشانہ بناتے ہوئے انہیں مزدور مخالف اور "فریب دہ” قرار دیا ہے۔ ملک کی 10 بڑی مزدور یونینوں نے اعلان کیا ہے کہ وہ آئندہ بدھ کو ملک گیر احتجاج کریں گی۔

بین الاقوامی خبر رساں ادارے کے مطابق، یونینوں نے مشترکہ بیان میں کہا کہ اگرچہ نئے قوانین میں سوشل سیکورٹی اور کم از کم اجرت جیسی سہولتوں کا ذکر ہے، لیکن اسی کے ساتھ کمپنیوں کو یہ اختیار بھی دیا جا رہا ہے کہ وہ محنت کشوں کو آسانی سے ملازمت پر رکھ یا برطرف کر سکیں۔

یہ بیان ایسے وقت سامنے آیا ہے جب وزیر اعظم نریندر مودی پانچ سال پہلے پارلیمنٹ سے منظور ہونے والے چار جامع لیبر قوانین کو عملی طور پر نافذ کر رہے ہیں۔ حکومت کا مؤقف ہے کہ ان اصلاحات کا مقصد قوانین کو سادہ بنانا، سرمایہ کاری کا ماحول بہتر کرنا اور لیبر مارکیٹ کو زیادہ فعال بنانا ہے۔

نئے قوانین کے مطابق کارخانوں میں کام کے اوقات طویل کیے جا سکتے ہیں اور خواتین کو رات کی شفٹوں میں بھی تعینات کیا جا سکے گا۔ اسی طرح وہ حد بھی بڑھا دی گئی ہے جس کے بعد کسی کمپنی کو بڑے پیمانے پر برطرفیوں کے لیے سرکاری منظوری درکار ہوتی ہے۔ اب یہ حد 100 کی بجائے 300 کارکنان کر دی گئی ہے۔

صنعتی حلقے طویل عرصے سے سخت لیبر قوانین کو بھارت کی مینوفیکچرنگ سیکٹر کی ترقی میں رکاوٹ سمجھتے آئے ہیں، جو ملک کی چار کھرب ڈالر کی معیشت کا صرف ایک چھوٹا حصہ ہے۔ تاہم کئی کاروباری تنظیموں نے خبردار کیا ہے کہ نئے قوانین چھوٹے اور درمیانے درجے کے اداروں کے لیے اخراجات میں نمایاں اضافہ کر سکتے ہیں۔

کاروباری انجمنوں نے مطالبہ کیا ہے کہ حکومت مرحلہ وار نفاذ اور لچکدار میکانزم فراہم کرے تاکہ کمپنیوں پر اچانک دباؤ نہ بڑھے۔

بھارت کی ریاستوں کو اب اپنے مقامی قوانین کو ان چار وفاقی قوانین کے مطابق ہم آہنگ کرنا ہوگا، جو اجرتوں، صنعتی تعلقات، سماجی تحفظ اور کام کی جگہ کی سلامتی جیسے اہم شعبوں کا احاطہ کرتے ہیں۔