بھارتی سفارتی عملے کا افغانستان سے نکلنے کا اعلان

🗓️ 17 اگست 2021

سچ خبریں:بھارتی وزارت خارجہ نے اعلان کیا ہے کہ کابل ایئرپورٹ کے دوبارہ کھلنے اور تجارتی پروازوں کی بحالی کے ساتھ ہی کابل میں بھارتی سفیر اور سفارت خانے کے عملے کو فوری طور پر نکال لیا جائے گا۔
بھارتی وزارت خارجہ نے ایک بیان میں کہا ہے کہ کابل میں ہندوستانی سفیر اور سفارت خانے کا عملہ فوری طور پر افغانستان سے واپس آجائے گا، یہ فیصلہ طالبان کی طرف سے کابل پر قبضے کے بعد کیا گیا ہے،بھارتی وزارت خارجہ کے ترجمان ارندم باگچی نے منگل کی صبح کہا کہ موجودہ صورتحال کی وجہ سے یہ فیصلہ کیا گیا کہ کابل میں ہمارے سفیر اور سفارت خانے کا عملہ فوری طور پر بھارت واپس آئے گا۔

کابل میں بھارتی سفیر اور بھارتی سفارت خانے کے عملے کو کابل ایئر پورٹ کے دوبارہ کھلنے اور تجارتی پروازوں کی بحالی کے فورا بعد واپس بلایا جائے گا،واضح رہے کہ اس سے قبل امریکی فوج کے ایک جنرل نے اعلان کیا تھا کہ امریکی فوج کی جانب سے بند کیا جانے والا کابل ایئرپورٹ دوبارہ کھول دیا گیا ہے،پینٹاگون نے بھی کہا کہ وہ سفارت کاروں اور غیر ملکی شہریوں کی منتقلی کے لیے کابل ایئرپورٹ کو محفوظ بنانے کے لیے کام کر رہا ہے ، انہوں نے مزید کہا کہ کابل میں امریکی سفارت خانے کو بند کرنے کے لیے اقدامات کیےجارہے ہیں۔

واضح رہے کہ حالیہ دنوں میں جب کابل طالبان کے قبضے میں آگیا اور سابق صدر اشرف غنی بھاگ گئے تو ہزاروں کابلی افغانستان سے نکلنے کے لیے کابل ایئر پورٹ پر پہنچ گئے جن میں سے بیشتر پاسپورٹ یا ویزے کے بغیر تھے،یہ سب ایسے وقت میں ہوا جبکہ کابل ایئرپورٹ کے تمام ملازمین اپنی ڈیوٹی چھوڑ چکے تھے اور کوئی بھی فلائٹ لائن پر لوگوں کی موجودگی کو نہیں روک رہا تھا۔

یادرہے کہ اس سے قبل امریکی محکمہ دفاع اور محکمہ خارجہ نے ایک مشترکہ بیان میں اعلان کیا تھا کہ وہ کابل ہوائی اڈے پر فضائی ٹریفک کا کنٹرول سنبھال لیں گے۔