برطانوی خفیہ ادارے کا سکینڈل، برسوں کی پردہ پوشی بے نقاب

?️ 9 دسمبر 2025

برطانوی خفیہ ادارے کا سکینڈل،برسوں کی پردہ پوشی بے نقاب

 شمالی آئرلینڈ کے تنازع سے متعلق ایک تہلکہ خیز تحقیقاتی رپورٹ میں انکشاف ہوا ہے کہ برطانیہ کے خفیہ اداروں، خاص طور پر ایم آئی فائیو (MI5)، نے ایک دوہرے ایجنٹ کو برسوں تک تحفظ دیا، حالانکہ وہ درجنوں افراد کے اغوا، تشدد اور قتل میں ملوث تھا۔

کینووا انکوائری کے نام سے شائع ہوئی، جس میں “اسٹیک نائف” کے کوڈ نام سے سرگرم اس ایجنٹ کے کردار کا جائزہ لیا گیا۔ رپورٹ کے مطابق برطانوی سکیورٹی ادارے اس کی مجرمانہ سرگرمیوں سے آگاہ تھے، لیکن اس کے باوجود اسے “قیمتی جاسوس” سمجھ کر بچاتے رہے اور بعض مواقع پر پولیس کی تفتیش سے بھی بچایا گیا۔

تحقیق میں 101 قتل اور اغوا کے واقعات کا جائزہ لیا گیا اور نتیجہ اخذ کیا گیا کہ اس جاسوس کی وجہ سے شاید جتنی جانیں بچیں، اس سے کہیں زیادہ ضائع ہوئیں۔ رپورٹ میں ایم آئی فائیو پر یہ الزام بھی عائد کیا گیا کہ اس نے اہم دستاویزات جان بوجھ کر تاخیر سے فراہم کیں، جس سے مزید تحقیقات اور انصاف کے امکانات محدود ہو گئے۔

رپورٹ میں برطانوی حکومت سے مطالبہ کیا گیا ہے کہ وہ “نہ تصدیق، نہ تردید” کی پالیسی ترک کرے اور اس ایجنٹ کی شناخت کو باضابطہ طور پر تسلیم کرے تاکہ متاثرہ خاندانوں کو سچائی تک رسائی مل سکے۔

ایم آئی فائیو کے سربراہ نے تاخیر سے دستاویزات فراہم کرنے پر افسوس کا اظہار کیا اور کہا کہ یہ دانستہ طور پر نہیں ہوا، تاہم متاثرہ خاندانوں اور ناقدین نے اس وضاحت کو ناکافی قرار دیا ہے۔

یہ اسکینڈل اب صرف ایک جاسوس کا معاملہ نہیں رہا بلکہ برطانیہ میں شفافیت، ماضی کے جرائم پر جوابدہی اور متاثرین کو انصاف فراہم کرنے کے حوالے سے ایک بڑا سوال بن چکا ہے۔