ایران میں صیہونی جاسوس گروہ تباہ

?️ 25 جولائی 2022

سچ خبریں:ایران نے صیہونی خفیہ تنظیم موساد سے جڑے جاسوسی کے ایک نیٹ ورک کو تباہ کر دیا۔
ارنا کی رپورٹ کے مطابق ایرانی محکمہ انٹیلی جنس نے کہا ہے کہ صیہونی جاسوس تنظیم کے ایجنٹوں اور آپریشنل نیٹ ورک کے عناصر کو جو ملک میں دہشتگردانہ کاروائیوں کیلئے بھیجے گئے تھے، ہر قسم کے تخریب کارانہ اقدام سے پہلے گرفتار کر لیا گیا ہے۔

بیان میں کہا گیا ہے کہ اس دہشتگرد نیٹ ورک کے اراکین، کسی ہمسایہ ملک کے ذریعے موساد کی جاسوس اور دہشتگرد تنظیم کے ایجنٹوں سے رابطے میں تھے اور عراقی کردستان کے ذریعے ایران میں داخل ہوئے تھے نیز جدید ترین آپریشنل اور مواصلاتی آلات اور انتہائی طاقتور دھماکہ خیز مواد سے لیس تھے۔

بیان میں مزید آیا ہے کہ یہ عناصر کچھ حساس علاقوں اور پہلے سے طے شدہ اہداف میں تخریب کارانہ اور دہشتگردانہ کارروائیاں کرنے کا ارادہ رکھتے تھے تاہم ایران کے گمنام سپاہیوں نے ان کو کسی بھی تخریب کارانہ کارروائی سے پہلے گرفتار کرلیا اور ان کے تمام اسلحے، دھماکہ خیز مواد اور مواصلاتی آلات ضبط کر لئے۔

ساتھ ہی بیان میں یہ بھی کہا گیا ہے کہ اس دہشتگرد نیٹ ورک کے ساتھ کسی بھی اندرونی اور بیرونی تعلق کے بارے میں مزید معلومات جلد پیش کی جائیں گی جس کے سلسلہ میں تحقیقات جاری ہیں۔