امن ایسا ہونا چاہیے جو عزت کے ساتھ ہو

?️ 25 نومبر 2025

امن ایسا ہونا چاہیے جو عزت کے ساتھ ہو

یوکرین کے صدر ولودیمیر زلینسکی نے جنیوا میں امریکی اور یوکرینی وفود کے جاری مذاکرات کے تناظر میں ایک بار پھر اس امر پر زور دیا ہے کہ یوکرین کے لیے کسی بھی امن معاہدے کا بنیادی اصول پائیداری، مضبوطی اور عزت ہونا چاہیے۔

یورونیوز کے مطابق زلینسکی نے اتوار کے روز سوشل میڈیا پر جاری اپنے پیغام میں روس کو یوکرین میں جنگ کا واحد ذمہ دار قرار دیا۔ ان کا کہنا تھا کہ یہ جنگ صرف روس نے شروع کی اور اس کے وجود کی واحد وجہ بھی روس ہی ہے۔

زلینسکی کے بقول روسی کمانڈرز ایسے واضح احکامات کے تحت کارروائی کر رہے ہیں جو لامحدود بربریت کی اجازت دیتے ہیں اور اسی کے نتیجے میں محاذِ جنگ پر بھاری جانی نقصان اور یوکرینی شہروں پر مسلسل حملے جاری ہیں۔ انہوں نے روس پر یوکرینی بچوں کے اغوا اور انہیں اپنے ہی ملک کے خلاف لڑنے کے لیے ذہنی طور پر تیار کرنے کی کوشش کا الزام بھی لگایا۔

اس کے باوجود زلینسکی نے امریکہ اور اس کے اتحادیوں کی حمایت پر شکریہ ادا کیا اور کہا کہ ہر اس امریکی اور سابق صدر ڈونلڈ ٹرمپ کے بھی ممنون ہیں جن کی مدد نے یوکرینی جانیں بچانے میں کردار ادا کیا۔ انہوں نے یورپی یونین، جی ۷ اور جی ۲۰ ممالک کے تعاون کو بھی سراہتے ہوئے عالمی شراکت داروں سے کہا کہ وہ اپنی حمایت جاری رکھیں۔

زلینسکی کے یہ بیانات چند گھنٹے بعد سامنے آئے جب ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر یوکرین کے خلاف سخت تنقیدی پیغام جاری کیا تھا۔ ٹرمپ نے دعویٰ کیا کہ امریکا کی وسیع حمایت کے باوجود یوکرین نے اس کا شکریہ ادا نہیں کیا۔ انہوں نے ایک بار پھر یہ دعویٰ دہرایا کہ اگر روسی حملے کے وقت وہ صدارت میں ہوتے تو جنگ کبھی شروع نہ ہوتی۔

ٹرمپ نے اپنے بیان میں اس جنگ کو ’’خوفناک اور تباہ کن‘‘ قرار دیتے ہوئے الزام لگایا کہ ۲۰۲۰ کے صدارتی انتخابات میں دھاندلی ہوئی اور نتائج ان سے چرا لیے گئے۔ ان کے مطابق واشنگٹن اور کیف میں کمزور قیادت نے ایک ایسی جنگ کو جنم دیا جس سے سب کو نقصان ہوا۔