امریکی صدر کا بحری فوج کے لئے  کلاس ٹرمپ جہاز کا اعلان

امریکی صدر کا بحری فوج کے لئے  کلاس ٹرمپ جہاز کا اعلان

امریکی صدر ڈونلڈ ٹرمپ نے اعلان کیا ہے کہ امریکا کی بحریہ کے لیے نئے جنگی بحری جہازوں کی تیاری کا آغاز کر دیا گیا ہے جنہیں کلاس ٹرمپ کا نام دیا گیا ہے۔ امریکی میڈیا کے مطابق صدر ٹرمپ نے فلوریڈا میں اپنی ذاتی رہائش گاہ پر صحافیوں سے گفتگو کرتے ہوئے بتایا کہ اس منصوبے کے تحت جدید ترین جنگی بحری جہاز تیار کیے جائیں گے۔

انہوں نے کہا کہ اس کلاس کے ابتدائی دو بحری جہاز پہلے ہی تعمیر کے مرحلے میں داخل ہو چکے ہیں جبکہ مجموعی طور پر پچیس جنگی جہاز بنانے کا منصوبہ ہے۔ صدر ٹرمپ کے مطابق یہ بحری جہاز رفتار جسامت اور طاقت کے لحاظ سے اب تک تیار کیے گئے تمام جنگی جہازوں سے کہیں زیادہ جدید ہوں گے۔

ڈونلڈ ٹرمپ نے مزید بتایا کہ امریکی حکومت اس منصوبے کے لیے چھبیس ارب ڈالر مختص کرے گی اور یہ جہاز جوہری ہتھیار لے جانے کی صلاحیت بھی رکھتے ہوں گے۔ اس کے ساتھ ساتھ بارہ سے پندرہ نئی آبدوزوں کی تیاری بھی منصوبے کا حصہ ہے۔

صدر امریکا نے اپنی گفتگو میں وینزویلا کے ساحلوں پر تیل بردار جہازوں کی ضبطی کا بھی ذکر کیا اور کہا کہ ضبط شدہ ٹینکروں کا تیل امریکا کے اسٹریٹجک ذخائر یا فروخت کے لیے استعمال کیا جائے گا۔ انہوں نے دعویٰ کیا کہ امریکا ان ضبط شدہ تیل بردار جہازوں کو اپنے پاس رکھے گا۔

انہوں نے ایک بار پھر یہ مؤقف دہرایا کہ لاطینی امریکا میں امریکی حملوں کا ہدف صرف منشیات اسمگلر ہیں۔ واضح رہے کہ ٹرمپ اس سے قبل بھی وینزویلا کے خلاف سخت اقدامات اور مکمل بحری محاصرے کے دعوے کر چکے ہیں اور وینزویلا کی حکومت کو دہشت گرد تنظیم قرار دے چکے ہیں۔