امریکہ میں چینی شہریوں کے ساتھ بدسلوکی پر چین کا شدید احتجاج

سچ خبریں:چین کی وزارتِ خارجہ نے ایک باضابطہ بیان میں امریکہ کی جانب سے چینی شہریوں کے ساتھ روا رکھے جانے والے ناروا سلوک پر سخت اعتراض کیا ہے۔ 

بیان میں کہا گیا ہے کہ امریکہ میں داخلے کے وقت چینی شہریوں سے کی جانے والی بلاجواز اور غیر ضروری پوچھ گچھ  کسی صورت قابلِ قبول نہیں ہے۔

بیان کے مطابق، امریکا کے سابق صدر ڈونلڈ ٹرمپ کی حکومت نے گزشتہ ایک سال کے دوران بڑی تعداد میں چینی طلبہ اور محققین کو امریکا سے بے دخل کیا۔

واشنگٹن کی جانب سے چین پر امریکا سے ٹیکنالوجی چوری کرنے کے الزامات عائد کیے جا رہے ہیں، اسی بنا پر امریکی حکام یونیورسٹیوں اور تحقیقی اداروں میں چینی شہریوں کی سرگرمیوں کی کڑی نگرانی کر رہے ہیں۔

امریکی ذرائع ابلاغ نے یہاں تک دعویٰ کیا ہے کہ بعض چینی شہریوں کی امریکی محققین سے شادیاں بھی جاسوسی اور ٹیکنالوجی چوری کے تناظر میں دیکھی جا رہی ہیں، جسے چین نے بے بنیاد اور اشتعال انگیز قرار دیا ہے۔

چین نے اس مؤقف پر بھی تنقید کی ہے کہ امریکا ایک طرف چین پر ٹیکنالوجی چوری کا الزام لگاتا ہے، جبکہ دوسری جانب دنیا کی کئی بڑی ٹیکنالوجی کمپنیاں چین میں سرمایہ کاری کر رہی ہیں۔ بیان میں اس بات پر زور دیا گیا کہ بیجنگ جدید ٹیکنالوجیز کے شعبے میں تیزی سے ترقی کر رہا ہے اور بہت سے عالمی حریفوں کو پیچھے چھوڑ چکا ہے۔

چینی وزارتِ خارجہ نے امریکا سے مطالبہ کیا ہے کہ وہ چینی شہریوں کے جائز حقوق کا احترام کرے اور سیاسی بنیادوں پر کیے جانے والے امتیازی سلوک سے باز آئے۔