امریکہ مصر کو جدید میزائل سیسٹم فروخت کرے گا

امریکہ مصر کو جدید میزائل سیسٹم فروخت کرے گا

 امریکہ نے مصر کو جدید زمین سے فضا میں مار کرنے والے میزائل سسٹم فروخت کرنے کی منظوری دے دی ہے، جس کی مالیت تقریباً 4.67 ارب ڈالر ہے۔

قطری نشریاتی ادارے الجزیرہ کی رپورٹ کے مطابق امریکی محکمہ دفاع (پینٹاگون) نے جمعے کے روز اعلان کیا کہ وزارت خارجہ نے اس دفاعی معاہدے کی توثیق کر دی ہے۔ اس معاہدے کے تحت مصر کو چار جدید ریڈار سسٹمز، سینکڑوں میزائل، درجنوں کنٹرول یونٹس اور فنی، انجینئرنگ و لاجسٹک معاونت فراہم کی جائے گی۔

امریکی ڈیفنس سیکیورٹی کوآپریشن ایجنسی کے مطابق، مصر امریکہ کا اہم علاقائی اتحادی ہے اور اس دفاعی سودے کو امریکی خارجہ پالیسی اور قومی سلامتی کے اہداف سے ہم آہنگ قرار دیا گیا ہے۔

رپورٹ میں بتایا گیا کہ امریکی کانگریس بھی اس معاہدے سے آگاہ ہے اور اس نے منظوری دے دی ہے۔ اگر یہ سودا حتمی شکل اختیار کرتا ہے تو امریکہ کے 26 سرکاری اہلکار اور 34 دفاعی ماہرین مصر جائیں گے تاکہ وہاں تربیتی و تکنیکی معاونت فراہم کر سکیں۔

الجزیرہ نے مزید بتایا کہ اگرچہ مصر ایک طویل عرصے سے امریکہ کا قریبی اتحادی رہا ہے — خصوصاً 1979 میں اسرائیل کے ساتھ امن معاہدے کے بعد سے — لیکن حالیہ برسوں میں قاہرہ اور بیجنگ کے درمیان بڑھتے ہوئے تعلقات واشنگٹن کے لیے باعث تشویش بنے ہوئے ہیں۔

واضح رہے کہ اپریل اور مئی 2025 میں مصر اور چین کی فضائی افواج نے پہلی مشترکہ فوجی مشقیں بھی کیں، جس سے دونوں ممالک کے تعلقات میں گہرائی کا عندیہ ملا ہے۔

یہ پیش رفت ایک ایسے وقت میں سامنے آئی ہے جب امریکہ خطے میں اپنی دفاعی برتری قائم رکھنے کے لیے اتحادیوں کو جدید اسلحہ فراہم کر رہا ہے، تاہم اسلحہ کی فروخت کے پس پردہ سیاسی مفادات بھی چھپے ہوئے ہیں۔