الجفورہ پروجیکٹ کا مرحلہ مکمل، سعودی عرب میں روزانہ 450 ملین مکعب فٹ گیس کی پیداوار شروع

?️ 4 دسمبر 2025

الجفورہ پروجیکٹ کا مرحلہ مکمل، سعودی عرب میں روزانہ 450 ملین مکعب فٹ گیس کی پیداوار شروع

 سعودی عرب کے 100 ارب ڈالر مالیت کے بڑے گیس منصوبے الجفورہ کا پہلا مرحلہ مکمل ہو گیا ہے اور اس کے تحت روزانہ 450 ملین مکعب فٹ گیس کی پیداوار کا آغاز کر دیا گیا ہے۔

الجزیرہ کے مطابق، سعودی وزارت مالیات نے اپنے بجٹ 2026 کی رپورٹ میں اعلان کیا کہ آرامکو کے تحت قائم الجافورہ گیس پلانٹ کا پہلا فیز کامیابی سے مکمل ہو چکا ہے اور پیداوار باضابطہ شروع کر دی گئی ہے۔ وزارت نے اسے سال 2025 کی اہم ترقیاتی کامیابیوں میں شمار کیا ہے۔

الجفورہ کو امریکہ سے باہر سب سے بڑا شیل گیس پروجیکٹ قرار دیا جا رہا ہے اور اندازہ ہے کہ 2030 تک اس کی پیداوار مستقل بنیادوں پر 2 ارب مکعب فٹ یومیہ تک پہنچ جائے گی۔

آرامکو کے سی ای او امین الناصر کا کہنا ہے کہ منصوبے کا پہلا مرحلہ سال کے اختتام تک مکمل طور پر عملیاتی ہو جائے گا۔ گزشتہ ماہ انہوں نے اس منصوبے کو آرامکو کی سرگرمیوں کا "تاج کا نگینہ” قرار دیا تھا۔

سال کے آغاز میں آرامکو نے الجفورہ گیس پروسیسنگ پلانٹ کے لیے 11 ارب ڈالر سرمایہ جمع کیے، جو ایک لیز اور ری لیز معاہدے کے تحت امریکی کمپنی گلوبل انفراسٹرکچر پارٹنرز بلک راک کے زیرانتظام کی قیادت میں قائم کنسورشیم سے حاصل کیے گئے۔

100 ارب ڈالر کے اس مہنگے منصوبے میں 229 ٹریلین مکعب فٹ معیاری گیس کے ذخائر موجود ہیں، جو آرامکو کی عالمی سطح پر قدرتی گیس کے بڑے کھلاڑی بننے کی حکمتِ عملی کا اہم حصہ ہیں۔

رپورٹ کے مطابق، رواں سال کی تیسری سہ ماہی میں آرامکو کے منافع میں خام تیل اور پیٹرولیم مصنوعات کی قیمتوں میں کمی کے باعث 2.3 فیصد کمی دیکھی گئی، تاہم پیداوار میں اضافے کے باعث گزشتہ سہ ماہی کے مقابلے میں کارکردگی بہتر رہی۔