الجزائر کے دورے کے دوران فرانسیسی صدر کی توہین

?️ 28 اگست 2022

سچ خبریں:سوشل میڈیا پر شائع ہونے والی ایک ویڈیو میں الجزائر کے شہر اوران کے لوگوں کا فرانسیسی صدر ایمانوئل میکرون کے اس شہر کے دورے کے خلاف مظاہرہ دکھایا گیا ہے۔

ٹی آر ٹی نیوز ایجنسی کی رپورٹ کے مطابق میکرون کے اس سابق فرانسیسی نوآبادیاتی شہر کے دورے کے دوران شہریوں کے ایک ہجوم نے الجزائر کی تعریف میں نعرے لگائے، اس ویڈیو میں میکرون کو الجزائر کے شمال مغرب میں واقع شہر اوران میں سکیورٹی فورسز نے گھیرے میں لے رکھا تھا لیکن شہری الجزائر زندہ باد کے نعرے لگا رہے تھے۔

رپورٹ کے مطابق میکرون لوگوں کی طرف ہاتھ ہلا رہے تھے جب کہ وہ نعرے لگا رہے تھے، آخر میں وہ گاڑی میں بیٹھ کر چلے گئے، واضح رہے کہ فرانسیسی صدر شمالی افریقی ملک الجزائر کے تین روزہ دورے پر تھے جو ہفتے کے روز ختم ہوا، یہ دورہ الجزائر کی 132 سالہ فرانسیسی حکمرانی اور آٹھ سالہ تباہ کن جنگ کے بعد چھ دہائیوں کی آزادی کا جشن منانے کے دو ماہ سے بھی کم وقت کے بعد ہوا ہے۔

واضح رہے کہ فرانس اور الجزائر کے درمیان تعلقات کبھی اتنے کشیدہ نہیں رہے جتنے اب ہیں، موجودہ کشیدگی کی آگ وہ بیان تھا جو ایمانوئل میکرون نے 30 ستمبر 2021 کو الجزائر کے سیاسی نظام اور اس ملک کے عوام کے بارے میں دیا تھا۔

کہا جاتا ہے کہ میکرون کے اس ہفتے الجزائر کے دورے کا مقصد دو طرفہ تعلقات کو گہرا کرنا اور علاقائی چیلنجوں کے پیش نظر فرانس اور الجزائر کے درمیان تعاون کو مضبوط بنانا تھا۔