افغان صدر کی طالبان کو کھلی دھمکی

🗓️ 14 جولائی 2021

سچ خبریں:افغانستان کے صدر اشرف غنی نے طالبان کو دھمکی دیتے ہوئے کہا ہے کہ ہم طالبان کی کمر توڑ دیں گے اور آئندہ تین ماہ کے اندر ملک میں امن لوٹ آئے گا۔
خامہ نیوز ایجنسی کی رپورٹ کے مطابق افغانستان کے صدر اشرف غنی نے افغانسان میں طالبان دہشت گردوں کی پیشقدمی کی طرف اشارہ کرتے ہوئے کہا ہےکہ طالبان کی کمر جلد توڑ دی جائے گی اوران کے زیرِ قبضہ علاقے واپس لے لیے جائیں گے، افغان صدر اشرف غنی نے اپنے بیان میں کہا ہے کہ زیادہ تر شمالی صوبوں میں افغان فورسز اور طالبان میں شدید جھڑپیں جاری ہیں۔

افغان صدر نےصوبہ بلخ کے دورے کے دوران کہا کہ طالبان کے زیرِ قبضہ علاقے جلد واپس لے لیے جائیں گے اور اگلے 3 ماہ میں ملک بھر میں سکیورٹی کی صورتِ حال میں نمایاں بہتری آئے گی،یادرہے کہ افغان صدر اشرف غنی نے شمالی صوبوں کی سکیورٹی کی صورتِ حال کا جائزہ لینے کے لیے صوبہ بلخ کا دورہ کیا تھا۔

واضح رہے کہ امریکہ نے حال ہی میں بیس سال کی اپنی بغیر کسی نتیجہ کے اس ملک میں موجودگی کے بعدیہاں سے فوجی انخلا کا فیصلہ لیا ہے جبکہ اس فیصلے سے پہلے ہی افغان فوج اور طالبان کے درمیان شدید جھڑپیں ہو رہی تھیں جن میں امریکی فیصلہ کے بعد تیزی آئی ہے درایں اثنا متعدد تجزیہ کاروں کا کہنا ہے کہ یہ امریکہ کی چال ہوسکتی ہے تا کہ طالبان افغانستان پر قبضہ کر لیں اور وہ انھیں ختم کرنے کے لیے ایک بار پھر اس ملک میں واپس آجائے جیسا کہ متعدد امریکی عہدہ دار انتباہ دے چکے ہیں۔