اسرائیلی قابضین کی جانب سے جنگ بندی کی خلاف ورزیاں جاری رہیں گی:فلسطینی تجزیہ کار

اسرائیلی قابضین کی جانب سے جنگ بندی کی خلاف ورزیاں جاری رہیں گی:فلسطینی تجزیہ کار

 فلسطینی سیاسی تجزیہ کار ایاد القرا نے کہا ہے کہ غزہ میں اسرائیلی افواج کی جانب سے جنگ بندی کی بار بار خلاف ورزیاں اس بات کا ثبوت ہیں کہ قابض فورسز اس عمل کو روکنے کا کوئی ارادہ نہیں رکھتیں۔

خبر رساں ادارے شہاب کے مطابق، ایاد القرا نے بتایا کہ اسرائیل مخصوص پالیسی کے تحت تباہ شدہ رہائشی علاقوں میں اپنی موجودگی برقرار رکھے ہوئے ہے، جہاں وہ عام شہریوں پر فائرنگ کرتا ہے۔ اس کے علاوہ، جو بھی شخص ان علاقوں کے قریب جاتا ہے جنہیں اسرائیلی فوج پیلا زون قرار دیتی ہے، اس پر براہ راست گولیاں چلائی جاتی ہیں۔

القرا نے مزید کہا کہ اسرائیلی فورسز نے جنگ بندی کے دوسرے مرحلے میں طے شدہ انخلا کے معاہدے پر عمل نہیں کیا۔ ان کا کہنا تھا کہ یہ رویہ مستقبل میں بھی جاری رہے گا تاکہ فلسطینیوں پر دباؤ بڑھایا جا سکے اور ان کی زندگیوں کو مزید مشکل بنایا جا سکے۔ انہوں نے زور دیا کہ ثالثی کرنے والے ممالک کو اس اسرائیلی طرزِعمل کا سنجیدگی سے نوٹس لینا چاہیے۔

فلسطینی تجزیہ کار نے واضح کیا کہ اسرائیل کسی ثالث، فلسطینی یا امریکی فریق کا انتظار نہیں کرتا بلکہ وہ اپنی پالیسی جو قتل و دہشت گردی پر مبنی ہے کے مطابق عمل کرتا ہے۔

القرا کے مطابق، اسرائیلی وزیراعظم بنیامین نیتن یاہو اپنے حالیہ بیانات کے ذریعے مذاکرات کو طول دینے کی کوشش کر رہے ہیں، چاہے اس کے نتیجے میں اسرائیلی قیدیوں کی لاشیں ہی کیوں نہ ضائع ہو جائیں۔ ان کا کہنا تھا کہ نیتن یاہو اپنے آخری حربے  حماس کے پاس موجود اسلحے کے مسئلے  کو استعمال کر کے قیدیوں کی واپسی اور دوسرے مرحلے کی پیش رفت کو پیچیدہ بنانے کی کوشش کر رہے ہیں۔دو سال سے جاری تباہ کن جنگ کے باوجود، نیتن یاہو اپنے اعلان کردہ مقاصد حاصل کرنے میں ناکام رہے ہیں۔

رپورٹ کے مطابق، جب فلسطینی مزاحمت کاروں نے ۲۰ زندہ اسرائیلی قیدیوں اور چند ہلاک شدہ قیدیوں کی لاشیں حوالے کیں، تو ۴۸ قیدیوں کے مجموعے میں سے یہ مرحلہ تقریباً مکمل ہو گیا۔ یوں جنگ بندی کے پہلے مرحلے کے اختتام کی تیاری شروع ہو چکی ہے، جو امریکی صدر ڈونلڈ ٹرمپ کے اعلان کردہ منصوبے کے تحت عمل میں آیا تھا۔