اردن کا ایران سے متعلق کشیدگی کم کرنے کے لیے سیاسی راہ حل پر زور

اردن کا ایران سے متعلق کشیدگی کم کرنے کے لیے سیاسی راہ حل پر زور

اردن کے فرمانروا عبداللہ دوم نے ایران سے متعلق بڑھتی ہوئی کشیدگی کم کرنے کے لیے مکالمے اور سفارتی چینلز کے مؤثر استعمال کی ضرورت پر زور دیا ہے۔ انہوں نے یہ بات انڈونیشیا کے صدر پرابوو سوبیانتو سے ملاقات کے دوران کہی۔

اردنی شاہی دفتر کے مطابق دونوں رہنماؤں کی ملاقات عمان کے بسمان الزاہر محل میں ہوئی، جہاں دوطرفہ تعلقات کے فروغ اور خطے میں استحکام کے قیام سے متعلق امور پر تبادلۂ خیال کیا گیا۔ شاہ عبداللہ دوم نے شام اور لبنان میں امن و خودمختاری کے تحفظ کی کوششوں کی حمایت کا اعادہ کرتے ہوئے کہا کہ علاقائی تنازعات کے حل کے لیے سفارت کاری ہی مؤثر راستہ ہے۔

شاہ اردن نے فلسطین کے مسئلے پر انڈونیشیا کے مؤقف کو سراہا اور غزہ میں فلسطینیوں کی حمایت پر جکارتہ کے کردار کی تعریف کی۔ انہوں نے امید ظاہر کی کہ دونوں ممالک خطے میں امن کے قیام کے لیے مزید قریبی تعاون کریں گے۔

اس موقع پر صدر پرابوو سوبیانتو نے دو ریاستی حل کو مشرقِ وسطیٰ میں پائیدار امن کی بنیاد قرار دیتے ہوئے آزاد فلسطینی ریاست کے قیام کی حمایت کا اعادہ کیا۔ انہوں نے غزہ میں جنگ بندی معاہدے پر عمل درآمد کی ضرورت پر بھی زور دیا اور اس سلسلے میں اردن کے کردار کو سراہا۔

شاہ عبداللہ دوم نے مغربی کنارے میں کشیدگی بڑھانے والے اقدامات، غیر قانونی بستیوں کی توسیع اور القدس میں اسلامی و مسیحی مقدسات کی بے حرمتی پر بھی تشویش کا اظہار کیا اور خبردار کیا کہ ایسے اقدامات پورے خطے کے امن کے لیے خطرہ بن سکتے ہیں۔